उस्मानाबाद: जिल्ह्याच्या बहुतांश भागांत सोमवारी (ता.एक) रात्रीपासून मंगळवारच्या (ता.दोन) पहाटेपर्यंत मान्सूनपूर्व पावसाने हजेरी लावली. मंगळवारी सकाळी आठपर्यंत संपलेल्या गेल्या २४ तासांत जिल्ह्यात सरासरी १२.३८ मिलीमीटर पाऊस नोंदला गेला. जून महिन्याची सुरवात होताच मान्सूनपूर्व पावसाने जिल्ह्याच्या बहुतांश भागांत हजेरी लावली. गेल्या तीन चार दिवसांपासून उन्हाची तीव्रता वाढल्याने उष्णतेत वाढ झाली होती. ढगाळ वातावरण निर्माण होऊन काही भागांत मान्सूनपूर्व पाऊसही झाला.

हे वाचंलत का? - आता पाच मिनिटांत कोरोनाचे निदान; राज्यातील पहिलाच प्रयोग

गेल्या महिनाभरापासून कडाक्याचे ऊन असतानाही शेतकऱ्यांनी खरीप पेरणीसाठी शेतीच्या मशागतीची कामे सुरू केली होती. बहुतांश शेतकऱ्यांची ही कामे अंतिम टप्प्यात आहेत. आता शेतकऱ्यांना प्रतीक्षा दमदार पावसाची आहे. यंदा लॉकडाऊनमुळे कृषी विभागाने खत व बियाण्यांच्या वाटपाचे नियोजन केले असून, शेतकरी गटांमार्फत थेट बांधावर खत पोचविण्याची कामे वेगाने सुरू आहेत.

बियाणे खरेदीसाठी शेतकरी पावसाच्या प्रतीक्षेत आहेत. सोमवारी दुपारपासूनच जिल्ह्याच्या काही भागांत ढगाळ वातावरण निर्माण होऊन रिमझिम पाऊस झाला. उस्मानाबाद शहरात रात्री साडेदहाच्या सुमारास पावसाला सुरवात झाली. २५ मिनिटे मध्यम स्वरूपाचा पाऊस झाला. मंगळवारी पहाटेच्या सुमारासही पाऊस झाला. जिल्ह्यातील ४२ पैकी ३८ महसूल मंडळात कमी- अधिक प्रमाणात पाऊस झाला.

क्लिक करा: सावधान!! कोविडच्या मृत्युदरात औरंगाबाद देशापेक्षाही आहे पुढे

तुळजापूर तालुक्यातील मंगरुळ महसूल मंडळात अतिवृष्टी झाली. या मंडळात सर्वाधिक ६७ मिलीमीटर पाऊस नोंदला गेला. तेर (ता. उस्मानाबाद) महसूल मंडळात ४८ मिलीमीटर, तुळजापूर महसूल मंडळात ३९ मिलीमीटर पाऊस नोंदला गेला. उस्मानाबाद तालुक्यातील सर्व आठ महसूल मंडळात पावसाने हजेरी लावली. तुळजापूर तालुक्यातील सर्व सात, उमरगा तालुक्यातील पाचपैकी चार, लोहारा तालुक्यातील सर्व तीन, कळंब तालुक्यातील सर्व सहा, भूम तालुक्यातील पाचपैकी तीन, वाशी तालुक्यातील सर्व तीन, परंडा तालुक्यातील पाचपैकी चार महसूल मंडळात पावसाने हजेरी लावली.

हेही वाचा:शेतकऱ्यांनो...निंबोळी अर्क तयार करण्याची हीच खरी वेळ, विनाखर्च बनविण्याची ही आहे पद्धत

बहुतांश महसूल मंडळात भीज पाऊस झाला आहे. माकणी (ता. लोहारा) येथे मंगळवारी पहाटे एकच्या सुमारास वीस मिनिटे मध्यम स्वरुपाचा पाऊस झाला. येडशी (ता. उस्मानाबाद) येथे रात्रभर भीज पाऊस सुरू होता. तुरोरी (ता. उमरगा) परिसरात मध्यरात्रीपासून पहाटे पाचपर्यंत भीजपाऊस झाला. केसरजवळगा (ता. उमरगा) परिसरात पहाटे दोन ते तीनच्या दरम्यान तासभर मध्यम स्वरुपाचा पाऊस झाला.

इटकळ (ता. तुळजापूर) परिसरात पहाटे तीन ते चार या वेळेत मध्यम स्वरुपाचा पाऊस झाला. तेर (ता. उस्मानाबाद) येथे सोमवारी रात्री नऊ ते दहा दरम्यान तासभर मध्यम स्वरुपाचा पाऊस झाला. तेर महसूल मंडळात ४८ मिलीमीटर पाऊस नोंदला गेला. पाथरुड (ता. भूम) परिसरात पहाटे एकपासून पाचपर्यंत भीजपाऊस झाला. वाशी येथे सोमवारी रात्री नऊपासून तासभर पावसाने हजेरी लावली. मुरुम (ता. उमरगा) परिसरात पहाटे दोनच्या सुमारास वीस मिनिटे मध्यम स्वरुपाचा पाऊस झाला.

हेही वाचा- वडिलाचा दफनविधी झाल्याच्या दिवशीच मुलगा पॉझिटिव्ह