हिंगोली : अशोक चव्हाण हे पुन्हा राज्याचे मुख्यमंत्री होतील, असा विश्वास आमदार डॉ. प्रज्ञा सातव यांनी व्यक्त केला.लोकसभा निवडणुकीच्या तयारीचा भाग म्हणून काँग्रेसकडून मराठवाड्यातील अनेक जिल्ह्यांमध्ये आढावा बैठकी सुरू आहेत. महाविकास आघाडी सरकारमध्ये जागा वाटपासंदर्भात प्राथमिक बोलणी झाली असून,

काँग्रेसने हिंगोली मतदारसंघावरही दावा सांगितला आहे. या पार्श्वभूमीवर काँग्रेसच्या मराठवाड्यातील नेत्यांनी गुरुवारी येथे आढावा बैठक घेतली. आमदार सातव या देखील बैठकीला उपस्थितीत होत्या. बैठकीनंतर माध्यमांशी बोलताना त्यांनी अशोक चव्हाण यांचा उल्लेख भावी मुख्यमंत्री म्हणून केला. यावर त्या ठामही होत्या. अशोक चव्हाण हे या आधी राज्याचे मुख्यमंत्री होते.

मराठवाड्यातील व्यक्तीने या राज्याचे नेतृत्व करावे, अशी माझी, प्रत्येक काँग्रेस कार्यकर्त्यांची, जनतेची देखील इच्छा आहे. शंभर टक्के नव्हे तर दोनशे टक्के चव्हाण हे मुख्यमंत्री होतील. राज्यात विधानसभेच्या सर्वाधिक जागाही काँग्रेसच जिंकेल, असा दावादेखील त्यांनी केला.