हिंगोली : एसटी महामंडळाचे मालवाहू वाहतूक करणाऱ्या चालकांचा छळ होत असल्याचा धक्कादायक प्रकार समोर आला आहे. हिंगोली जिल्ह्यात मागील आठ दिवसापासून १६  मालवाहू वाहतूक करणारे चालक जिल्ह्यात अडकून पडले आहेत. माल  असेल तरच परत या अन्यथा रिकाम्या हाताने परत येऊ नका असा अजब सल्ला एस टी महामंडळाच्या वरिष्ठ अधिकाऱ्यांनी वाहनचालकांना दिला आहे.

त्यामुळे वाहन चालकाची परिस्थिती घर कब आओगे ट्रकच्या मागे लिहिलेल्या स्लोगन प्रमाणे झाली आहे. आठ दिवसापासून अडकलेल्या १६  चालकांना मोठा गैरसोयीचा सामना करावा लागत असल्याचा धक्कादायक प्रकार समोर आला आहे. त्याचबरोबर या सर्व चालकांनी  बोलताना खंत व्यक्त केली आहे. त्याचबरोबर हिंगोली आगाराकडून कुठलीही राहण्याची व्यवस्था न केल्यामुळे संसारच एसटी बस मध्ये थाटावा लागत आहे. तर पिण्याच्या पाण्याची आणि जेवणाची देखील व्यवस्था नसल्याची कबुली  चालक बबन डहाळे,  गोपीनाथ मुरकुटे, अशोक जाधव, परळी आगार यांनी दिली आहे.

हेही वाचा - हिंगोली : मेथा येथील गजानन जागृत देवस्थान भाविकांचे श्रद्धास्थान

महामंडळाच्या उत्पन्नात घट झाली

दरम्यान, कोरोना संकटामुळे मागच्या काही दिवस एसटी महामंडळाच्या बसेस बंद होत्या यामुळे महामंडळाच्या उत्पन्नात घट झाली होती. तसेच कर्मचाऱ्यांना देखील अनेक अडचणीना सामोरे जावे लागले. अनेक ठिकाणी कर्मचारी कपातीचा निर्णय देखील झाला.

शेतकऱ्यांच्या भाजीपाल्याला प्राधान्य देत ही सेवा सुरू

यात सावरत एसटी महामंडळाने लाँकडाऊन काळात मालवाहू सेवा सुरू केली. यात शेतकऱ्यांच्या भाजीपाल्याला प्राधान्य देत ही सेवा सुरू झाली. काही दिवस याला प्रतिसाद देखील मिळाला मात्र आता लाँकडाऊन संपल्याने मालवाहतूक करणार्या या गाड्यात मालवाहतूकिवर परिणाम झाला आहे.

येथे क्लिक करा - राजेंद्र देशमुख यांचे जिल्हा परिषद सदस्यत्व रद्द- जिल्हाधिकाऱ्यांनी काढले आदेश

गाडी भरण्यासाठी प्रतिक्षा करण्याची वेळ

मात्र एसटी महामंडळाने या गाड्यांच्या चालकाना रिकाम्या हाताने येऊ नका अशी तंबी दिल्याने चालक अडचणी आहेत. ज्या ठिकाणी गाड्या आहेत त्या परत येताना रिकामे येऊ नका असे सांगितले असल्याने चालकाना आहे त्याठिकाणी थांबत गाडी भरण्यासाठी प्रतिक्षा करण्याची वेळ आली आहे.

संपादन - प्रल्हाद कांबळे