देगलूर, (जि.नांदेड) ः ‘कोराेना’च्या पार्श्वभूमीवर संपूर्ण देशात संचारबंदी लागू केल्यानंतर राज्य सरकारने सीमाबंदी, जिल्हा बंदी लागू केल्याने सर्वत्र लॉकडाऊन सुरू आहे. अशा कठीण परिस्थितीत प्रत्येक राज्यातील मजुरांचे स्थलांतर रोखण्यासाठी व त्यांना आहे तिथेच थांबण्यासाठी संपूर्ण व्यवस्था तेथील प्रशासनातर्फे केली आहे. मात्र, या आदेशाची अंमलबजावणी तेलंगणा राज्यात होताना दिसून येत नसून त्याचा फटका नांदेड जिल्ह्यातील मजुरांना बसला आहे. धान्यसाठा संपल्याने तीस मजुरांची उपासमार झाल्याने ते तेलंगणातील खम्ममपासून सत्तर किलोमीटर अंतरावरील दुर्गम अशा शेतात अडकले आहेत.

अश्रुंना वाट मोकळी
मजुरांनी आपबिती सांगताना अश्रुंना वाट मोकळी करून माहिती दिली. कुशावाडी, गवंडगाव तांडा (ता.देगलूर) शिरूर चौकी, बारूळ, (ता.कंधार) यांच्यासहीत इतर मजूर तेथे अडकून पडले आहेत. पोटाची खळगी भरण्यासाठी गावापासून सातशे किलोमीटरवर असलेल्या पाेकलगुडम (जि.काेतागुडम) येथील रामदास लच्छीराम या शेतकऱ्याच्या शेतातील मिरची तोडण्यासाठी गेल्या तीन महिन्यापूर्वी महाराष्ट्रातून येथे मजूर गेले आहेत. मात्र, गेल्या आठवड्यापासून ‘कोरोना’च्या पार्श्वभूमीवर संचारबंदी लागू झाल्याने आम्हाला दुर्गम भागातील शेतातून ना गावात जाता येते, ना तालुक्याच्या ठिकाणी जाता येते. आमच्या जवळील धान्यसाठा संपल्याने लेकरा बाळांची उपासमार होत असून येथील सरकारी यंत्रणेकडून आम्हाला अद्याप मदत मिळाली नसल्याची माहिती शिवाजी जाधव यांनी ‘सकाळ’शी बोलताना दिली.

हेही वाचा -  कोरोना इफेक्ट- दोन लाखाची घरफोडी

नांदेडच्या जिल्हाधिकाऱ्यांनी घालावे लक्ष 
जिल्हाधिकारी डॉ.विपिन यांनी जिल्ह्यातील मजुरांची तेलंगणात धान्याअभावी होत असलेली उपासमार थांबविण्यासाठी तेथील प्रशासनाला याची माहिती देऊन त्यांचा प्रश्‍न सोडवावा अन्यथा त्या तीस मजुरांच्या स्थलांतरासाठी प्रशासन पातळीवर प्रयत्न करावेत, अशी मागणी गावकऱ्यांकडून केली जात आहे.

मजुरांची आर्त हाक
पोटाची खळगी भरण्यासाठी गेलेले हे कुटुंब परराज्यात दुर्गम अशा शेतात वास्तव्यास आहे. त्यामुळे या संचारबंदीची पुसटशीही कल्पना त्यांना आली नसावी अन्यथा ते गावाकडे केव्हाच परतले असते. मात्र, अशा परिस्थितीत तेथील प्रशासनाने त्यांची योग्य ती सोय करायला हवी, अशी प्रतिक्रीया माजी प्राचार्य व कुशावाडीचे ज्येष्ठ नागरिक गंगाधरराव हिंगोले यांनी या प्रसंगी बोलताना दिली.