पूर्णा (जि. परभणी) : संपूर्ण जगाला शांतीचा संदेश देणाऱ्या भारतात अडीच हजार वर्षांपूर्वी उगम पावलेला तथागत भगवान गौतम बुद्धांचा धम्म मधल्या काळात भारत देशात लोप पावत होता. परंतु, बौद्ध धम्म पुन्हा गतिमान करण्याचे मोठे काम डॉ. बाबासाहेब आंबेडकर यांनी केले. धम्म प्रचार व प्रसार अधिक गतिमान करण्यासाठी भिक्कू संघासह प्रत्येक बौद्ध उपासक, उपासिका यांनी प्रयत्न करणे गरजेचे असल्याचे मत भदंत वोनेयुंग (द.कोरिया) यांनी शुक्रवारी (ता. ३१) व्यक्त केले.

पूर्णा येथील भदंत उपाली थेरो नगर परिसरात देश - विदेशातील शेकडो भंतेजींच्या उपस्थितीत शुक्रवारी (ता. ३१) बुद्धमूर्ती प्रतिष्ठापणा, बुद्ध विहाराच्या नूतन इमारतीचे उद्‍घाटन व सतराव्या बौद्ध धम्म परिषदेचे उद्‍घाटन करण्यात आले. या वेळी ते बोलत होते. भदंत डॉ. उपगुप्त महाथेरो यांच्या अध्यक्षतेखाली भदंत धम्मसेवक महाथेरो यांच्या हस्ते परिषदेचे उद्‍घाटन करण्यात आले. प्रसंगी राज्यमंत्री संजय बनसोडे, महापौर अनिता सोनकांबळे, डॉ. एस. पी. गायकवाड, सभापती अशोक बोकारे, शहाजी देसाई, रितेश काळे, सचिव ॲड. महेंद्र गायकवाड, प्रकाश ढोणे, प्रकाश कांबळे, उत्तम खंदारे, ॲड. रवी गायकवाड, प्राचार्य मोहनराव मोरे आदींची उपस्थिती होती.

हेही वाचा व पहा - Video : परभणीत बॅंकेच्या संपाने कोटींचे व्यवहार ठप्प !

‘लुम्बिनी’ स्मरणिकेचे प्रकाशन
या वेळी ‘लुम्बिनी’ स्मरणिकेचे प्रकाशन अखिल भारतीय भिक्खू संघाचे महासचिव भदंत प्रज्ञादीप महाथेरो यांच्या हस्ते करण्यात आले. दरम्यान, सकाळच्या सत्रात थायलंडचे भदंत फ्रा सूर्या व नगराध्यक्षा गंगाबाई एकलारे यांच्या हस्ते धम्म ध्वजवंदन करण्यात आले. या वेळी प्रमुख पाहुणे म्हणून साऊथ कोरियाचे भदंत चेउंगडॅम व भदंत वोनेयुंग, म्यानमारचे भंते आयुपाला, डॉ. मैत्रिवीर नागार्जुन (हैदराबाद), भदंत प्रज्ञादीप महाथेरो यांच्यासह देश - विदेशातील शेकडो भंते उपस्थित होते. त्यानंतर सकाळी साडेदहा वाजता बुद्ध विहारात भव्य अशा बुद्धमूर्तीची प्राणप्रतिष्ठा करण्यात आली. या वेळी सामुदायिक त्रिरत्न वंदना, पूजा, परित्राण घेण्यात आले. डॉ. आंबेडकर नगर येथून भिक्खू संघासह भगवान गौतम बुद्ध व डॉ. बाबासाहेब आंबेडकर यांच्या प्रतिमेची मिरवणूक काढण्यात आली. या परिषदेस डॉ. बी. आर. आंबेडकर स्मारक व बुद्ध विहार समितीचे पदाधिकारी, भारतीय बौद्ध महासभेचे पदाधिकारी व हजारो धम्म उपासक, उपासिका उपस्थित होते.

हेही वाचा - संस्काराची शाळा ही आईवडील असते : असं कोण म्हणाले ते वाचाच

बुद्ध विहारासाठी निधी देणार : राज्यमंत्री बनसोडे
या वेळी राज्यमंत्री संजय बनसोडे यांनी शरद पवार यांनी मुंबईतील डॉ. बाबासाहेब आंबेडकर यांच्या स्मारक उभारणी कार्यात स्वतः लक्ष घातले असून त्यांनी त्या बाबत अत्यंत बारिकसारिक सूचना केल्या. डिसेंबर २०२२ पूर्वी हे जागतिक दर्जाचे दर्जेदार स्मारक पूर्ण होइल, असे त्यांनी सांगितले. येथील बुद्ध विहारासाठी मंजूर असलेला निधी प्राधान्याने देण्याचे त्यांनी अभिवचन दिले.