जालना : शेततळ्यात बुडून तीन मुलांसह चौघांचा मृत्यू झाल्याची घटना सामनगाव (ता. जालना) येथे मंगळवारी (ता. ६) घडली. मृतांमध्ये दोन सख्खे भाऊ, पिता-पुत्राचा समावेश आहे.

ओंकार कृष्णा पडूळ (वय ७) ), भागवत कृष्णा पडूळ (९), युवराज भागवत इंगळे (७) हे दुपारी खेळत असताना सामनगावातील शेततळ्‍यात पोहण्यासाठी उतरले. अंदाज न आल्याने ते पाण्यात बुडू लागले. आरडाओरड सुरू होताच शेततळ्याशेजारी असलेले भागवत जगन्नाथ इंगळे ( ३६) हे तिघांना वाचविण्यासाठी शेततळ्यात उतरले.

मात्र तीन मुलांसह त्याचाही पाण्यात बुडून मृत्यू झाला. या दुर्दैवी घटनेत मृत्युमुखी पडलेले ओंकार व भागवत पडूळ हे सख्खे भाऊ तर भागवत जगन्नाथ इंगळे व युवराज भागवत इंगळे हे पिता-पुत्र आहेत.

घटनेची माहिती गावात कळताच ग्रामस्थांनी शेततळ्याकडे धाव घेतली. जालना तालुका पोलिसांना ग्रामस्थांच्या मदतीने चौघांचे मृतदेह शेततळ्याबाहेर काढले व पंचनामा केला. उत्तरीय तपासणीसाठी मृतदेह जिल्हा सामान्य रुग्णालयात दाखल केले. या घटनेने गावावर शोककळा पसरली आहे.