औरंगाबाद : मुंबईहून औरंगाबादला आलेल्या जेट एअरवेजच्या विमानाला चिकलठाणा आंतरराष्ट्रीय विमानतळावर लँडिंग करताना बगळ्याने धडक दिली. प्रसंगावधान राखत वैमानिकाने सुखरूप लँडिंग केले त्यामुळे प्रवाशांनी सुटकेचा श्वास सोडला. असे असले तरी पुन्हा परतीच्या प्रवासाला मुंबईला जाणाऱ्या प्रवाशांचा खोळंबा झाला.

जेट एअरवेजचे (नं. 9 डब्ल्यू 355), मुंबईहून औरंगाबादला आलेले विमान चिकलठाणा विमानतळावर लँडिंग करत असताना शेवटच्या टप्प्यात विमानाचा डाव्या पंख्याला पक्षाने धडक दिली. वैमानिकाने प्रसंगावधान राखत विमानाचे सुखरूप लँडिंग केले. मात्र याच विमानाने परत मुंबईला जाणाऱ्या 21 प्रवाशांचा खोळंबा झाला. मुंबईला जाणाऱ्यांमध्ये आमदार अतुल सावे, मराठवाडा वैधानिक विकास मंडळाचे अध्यक्ष डॉ. भागवत कराड, बापू घडामोडे यांचा समावेश होता. विमान तांत्रिक कारणामुळे रद्द झाल्याचे जेट एअरवेज प्रशासनाने जाहीर केले. त्यानंतर अनेकांनी प्रवास रद्द केला, तर काहींनी सायंकाळच्या विमानाने जाण्याचा निर्णय घेतला.