नांदेड :  लोहा - नांदेड राष्ट्रीय महामार्ग ३६१ च्या धीम्या गतीच्या कामाला आता वेग आला आहे. पार्डी ,कारेगाव भागात महामार्गात येणारी पक्की घरे पाडण्यास प्रारंभ झाला आहे. लोहा शहरालगतच्या बायपाससाठी जवळपास ६४ एकर जमीन संपादित करण्यात आली. त्याचा ३१ कोटी ५२ लाखाचा मोबदला ३०६ शेतकऱ्यांना मिळणार आहे.

लोहा शहरातून राष्ट्रीय महामार्ग ३६१ रस्ता जाणार नाही त्यासाठी जुन्या शहराला वळसा घालून बायपास जाणार आहे. २५ हेक्टर ४४ आर एवढे क्षेत्र संपादित करण्यात आले आहे. उपविभागीय अधिकारी पी. एस. बोरगावकर यांच्या कार्यालयात ता. १० फेब्रुवारी रोजी ३०६ बाधित जमीन मालकांना नोटीस देवून बोलविण्यात आले होते. त्यासाठी ३१ कोटी ५२ लाख रुपये मावेजा दिला जाणार आहे. त्यासाठीची प्रक्रिया सुरु झाली आहे.

हेही वाचा - आता लेकीच्या लग्नाला या...! कर्जमुक्त शेतकऱ्याने  मुख्यमंत्र्यांना दिले निमंत्रण

पार्डी कारेगाव- सोनखेडमध्ये पाडापाडी

नॅशनल हायवे ३६१ साठीच्या कामाला गती आली आहे. पार्डी- कारेगाव या गावात रस्त्यात येणारी पक्की घरे बसस्थानक पाडण्यात येत आहे. सोनखेडमध्ये अद्याप काम सुरु झाले नाही. या पक्क्या घरांचा मावेजा संबंधितांना दिल्यानंतरच कामाला आरंभ झाला आहे.

शहरी भागाला मावेजाचा फटका

३६१ नॅशनल हायवेसाठी लोहा शहरातील ज्या मालमत्ता धारक व शेतकर्‍यांचे भूसंपादन केले त्यांना ग्रामीण भागापेक्षा कमी गुणांकानुसार दर मिळाला. याचा आर्थिक फटका शेतमालक मालमत्ताधारकांना बसला आहे. यांना न्याय मिळावा यासाठी खासदार प्रतापराव पाटील चिखलीकर यांच्या नेतृत्वाखाली प्रयत्न सुरु आहेत. असे कृती समितीचे अध्यक्ष माणिकराव मुकदम यांनी सांगितले. या अनुषंगाने राजेश मुकदम यांनी गुणांक कसे व किती त्यानुसार मावेजा मिळायला पाहिजे असे सांगितले.

लोह्यातून सिमेंट रोड

खासदार प्रतापराव पाटील चिखलीकर यांनी बायपास टू बायपास म्हणजे बेरळी फाटा ते साई हॉटेल हा शहरातून जाणारा रस्ता सिमेंट करण्याचे जाहीर आश्वासन दिले. त्या अनुषंगाने नॅशनल हायवेच्या अधिकार्‍यांसोबत बैठक झाली. या बाबत लवकरच सर्वेक्षण केले जाणार आहे.