लातूर: तालुक्याचे सहायक निबंधक (सहकारी संस्था) अशोक कदम यांना मारहाण केल्याप्रकरणी एका गृहनिर्माण संस्थेचा माजी अध्यक्ष अशोक पंढरीनाथ मलवाडे (वय 68) याला पोलिसांनी अटक केली आहे. बुधवारी (ता. 26) सकाळी साडेदहा वाजता मध्यवर्ती प्रशासकीय इमारतीतील कदम यांच्या कार्यालयात हा प्रकार घडला. घटनेनंतर सहकार विभागातील अधिकारी व कर्मचाऱ्यांनी दिवसभर काम बंद ठेऊन घटनेचा निषेध केला.

पोलिसांनी सांगितले की, माजी अध्यक्ष असलेल्या अशोक मलवाडे याच्या स्वातंत्र्य सैनिक संग्राम सहकारी गृहनिर्माण संस्थेत गेल्या काही वर्षापासून प्लॉट वाटपावरून वाद सुरू आहेत. या प्रकरणाची उपविभागीय अधिकारी सुनिल यादव यांच्याकडे सुनावणीही सुरू आहे. संस्थेला सरकारने जमिन उपलब्ध करून दिलेली आहे. दरम्यान संस्थेतील माझा प्लॉट दुसऱ्याला दिला असून माझी फसवणुक झाली आहे, असा दावा करत अशोक मलवाडे (रा. सिद्धार्थ सोसायटी, स्वातंत्र्य सैनिक कॉलनी, लातूर) हा बुधवारी सकाळी सहायक निबंधक कदम यांच्याकडे केला.

औरंगाबादच्या बेगम यांची तब्बल १८ वर्षानंतर पाकिस्तानच्या तुरुंगातून सुटका; नातेवाईकांनी मानले पोलिसांचे आभार

फसवणूक केल्याबद्दल गुन्हा दाखल करा, असे तो कदम यांना म्हणू लागला. या वेळी कदम यांनी त्यांना तुमची फसवणुक झाली असेल तुम्ही स्वतः गुन्हा दाखल करा, अशी सूचना केली. त्यावरून मलवाडे याने शिवीगाळ करत कदम यांना मारहाण करायला सुरवात केली. मारहाणीत त्याने कदम यांचा शर्टही फाडला. तेथे उपस्थित प्रमाणित लेखा परिक्षक तसेच कार्यालयातील कर्मचाऱ्यांनी मध्यस्थी करत कदम यांना सुटका केली. एका कर्मचाऱ्याने लागलीच पोलिसांना दूरध्वनी केला. मलवाडे हा मारहाण करून तिथेच बसला होता. पोलिसांनी त्याला ताब्यात घेऊन अटक केली.

मराठवाड्याच्या ताज्या बातम्या वाचा

या प्रकरणी श्री. कदम (वय 53) यांच्या फिर्यादीवरून पोलिसांनी मलवाडे याच्याविरूद्ध मारहाण व सरकारी कामात अडथळा आणल्याप्रकरणी गुन्हा दाखल केला आहे. या घटनेनंतर सहकार विभागात खळबळ उडाली. काहीच चुक नसताना कदम यांना मारहाण झाल्याने विभागातील अधिकारी व कर्मचारी संतप्त झाले. सर्वांनी या घटनेचा निषेध केला व दोषीवर कडक कारवाईची मागणी करत दिवसभर काम बंद आंदोलन केले. दरम्यान मलवाडे याला पोलिसांनी अटक केल्याची माहिती शिवाजीनगर ठाण्याचे पोलिस निरीक्षक नानासाहेब लाकाळ यांनी दिली.

(edited by- pramod sarawale)