नांदेड ः दक्षिण मध्ये रेल्वे विभागातील नांदेड जवळील लिंबगाव ते चुडावा या स्थानकादरम्यान लाइन ब्लाॅकच्या कामामुळे दोन दिवस ठेवण्यात आलेल्या ब्लाॅकचा परिणाम शनिवारी पहिल्या दिवशी प्रवाशांना त्रासदायक ठरला. यामुळे नांदेड ते परभणी जाणाऱ्या तर पुर्णेहुन नांदेड, मुदखेडकडे जाणाऱ्या रेल्वेच्या वेळा कोडमडल्या तर अनेक रेल्वे उशिराने धावल्या.

सध्या मुदखेड ते परभणी या रेल्वे मार्गाचे दुहेरीकरण करण्याचे काम प्रगतीपथावर आहे. यामध्ये सध्या लिंबगाव ते पुर्णा दरम्यानचे काम अंतिम टप्प्यात आहे. यातच लिंबगाव ते चुडावा दरम्यान नव्याने बांधण्यात येणाऱ्या पुलाचे काम गतीने सुरु आहे. याच ठिकाणी दोन दिवसांचा लाइन ब्लाॅक हाती घेण्यात आला आहे. 

या रेल्वे धावल्या विलंबाने
ब्लॉकचा परिणाम दुपारी धावणाऱ्या चार गाड्यांवर झाला. ज्यामध्ये नारखेड-काचिगुडा, काचिगुडा-नारखेड, मनमाड-काचिगुडा तर काचिगुडा-नगरसोल या चार रेल्वेना पुर्णा व नांदेड येथे काही वेळेसाठी थांबविण्यात आले होते. तसेच नगरसोल ते नांदेड ही गाडी शनिवार, रविवारी परभणी ते नांदेड दरम्यान रद्द करण्यात आली. शनिवारी दुपारी १.२० ला नांदेड येथे आलेली नारखेड इंटरसिटी इक्सप्रेस २.१५ वाजेपर्यंत नांदेडलाच थांबविली हाेती. ही गाडी पुर्णा येथे ३.४५ वाजता पोहचली. त्यामुळे अनेकांची गैरसोय झाली. नांदेड येथे इंटरसिटी थांबविल्यामुळे काचिगुडा-नगरसोल ही पॅसेंजर मुदखेड येथे एक ते दोन पर्यंत उभी होती. यानंतर ती नांदेडला आली. परिणामी तिला परभणीपर्यंत जाण्यासाठी सायंकाळी सहा वाजले.

पुर्णेकरांची झाली गैरसोय
पुर्णा येथुन नांदेडला येणाऱ्या अनेक अप-डाउन करणाऱ्या प्रवाशांची शनिवारी गैरसोय झाली. नरखेड-काचिगुडा इंटरसिटी निर्धारित वेळेपेक्षा १.३० तास उशिराने धावली. परिणामी पुर्णा येथुन नांदेडला येणाऱ्यांना खासगी बसने प्रवास करावा लागला.

हेही वाचा - पोलिसांचे आता महाट्राफीक ॲप

सकाळपासूनच अनेक रेल्वे विलंबाने धावल्या
सध्या थंडी वाढल्याने व काहीसा धुक्याचा परिणाम त्यातच रेल्वेच्या विस्कळीत झालेल्या वेळापत्रकामुळे शनिवारी अनेक रेल्वे सकाळपासून विलंबाने धावल्या. यात धर्माबाद-मनमाड हायकोर्ट रेल्वे एक तास विलंबाने नांदेड येथे आली. सकाळी ६.४५ च्या दरम्यान नांदेडला आलेली रेल्वे औरंगाबाद येथे दुपारी १२ च्या सुमारास पोहचल्याने कामानिमित्त जाणाऱ्यांची गैरसोय झाली.

हेही वाचा - विद्यार्थी म्हणतात, आश्रमशाळेतील जेवण नको रे बाबा...

दुपारच्या कामाचा परिणाम रात्रीपर्यंत
लिंबगाव ते चुडावा दरम्याने दुपारी तीन तासांचा ब्लाॅक घेण्यात आल्यामुळे नांदेडहुन पुर्णेला जाणाऱ्या प्रत्येक रेल्वेला नेहमी लागणाऱ्या वेळेपेक्षा अर्धातासाचा उशिर झाला. लाइन ब्लाॅकमुळे लिंबगाव ते चुडावा दरम्यान जास्तीचा वेळ व जागोजागी काॅशन निर्माण झाले हाेते.

दाैंड-नांदेडमुळे मेडचल रेल्वे रद्द
दौंडहून नांदेडला येणारी पॅसेंजर सध्या दररोज किमान चार ते पाच तास उशिराने धावत आहे. शनिवारी पहाटे चारला येणारी गाडी दुपारी १२.३० वाजता पुर्णेपर्यंत आली होती. लाईन ब्लाॅकमुुळे ही गाडी पुर्णा ते नांदेड रद्द करण्यात आली. परिणामी याच गाडीचा रेक नांदेड-मेडचलला वापरला जातो. मात्र, नांदेडहुन मेडचलची रेल्वे शनिवारी रद्द करण्यात आली.