मराठा आरक्षणासाठी आंदोलन करणारे आंदोलनकर्ते मनोज जरांगे पाटील यांची सरकारच्या शिष्टमंडळाने भेट घेतली, त्यानंतर त्यांनी उपोषण मागे घेतलं. उपोषणानंतर मनोज जरांगे यांची प्रकृती खालावली होती, ते अशक्त झाले होते.उपचारांसाठी त्यांना रुग्णालयात दाखल करण्यात आलं. त्यांच्या प्रकृतीबाबत माहिती समोर आली आहे. नऊ दिवस उपोषण केल्यानं जरांगेंची प्रकृती खालावली आहे. त्यांचे जवळपास १२ किलो वजन घटले आहे. त्यांच्या प्रकृतीत सुधारणा होण्यासाठी पुढील दहा ते बारा दिवस त्यांना रुग्णालयात उपचार घ्यावे लागतील, अशी माहिती डॉक्टरांनी दिली आहे.

जरांगेंची प्रकृती खालावल्याचे डॉक्टरांनी सांगितले आहे. त्यांची किडनी आणि लिव्हरला सूज आल्याचेही सांगितले. त्यांचे वजन १२ किलोंनी घटले आहे. काही दिवस त्यांनी पाणी न प्यायल्याने प्रकृती खालावली आहे, असेही डॉक्टरांकडून सांगण्यात आले. सतत सुरू असलेले दौरे आणि उपोषणामुळे त्यांना अशक्तपणा जाणवत आहे. पुढील दहा दिवस त्यांच्यावर उपचार केले जाणार आहेत.

मनोज जरांगे हे उपचाराला उत्तम प्रतिसाद देत असून, त्यांना आणखी १५ दिवस उपचार घ्यावे लागणार आहेत. सध्या जरांगे यांना शारीरिक हालचाल करण्यास मर्यादा आहेत. राज्यभरातील दौरे आणि उपोषणामुळे जरांगे यांची प्रकृती खालावली आहे.

दरम्यान, मनोज जरांगे यांनी सप्टेंबरमध्ये जवळपास १७ दिवस उपोषणाला बसले होते. सरकारच्या शिष्टमंडळानं त्यांची आंतरवाली सराटीमध्ये भेट घेऊन मुदत मागितली होती. त्यानंतर जरांगेंचे महाराष्ट्रातील अनेक ठिकाणी सभा झाल्या. सरकारला दिलेली मुदत उलटून गेल्यानंतर पुन्हा ते दुसऱ्यांदा उपोषणाला बसले. हे उपोषण जवळपास ९ दिवस सुरू होते. अखेर सरकारच्या आश्वासनानंतर मनोज जरांगे यांनी उपोषण मागे घेतले. ९ दिवस उपोषणाला बसलेल्या मनोज जरांगेंची प्रकृती खालावली आहे. सध्या त्यांच्यावर उपचार सुरू आहेत.