कार्तिकी एकादशीची विठ्ठलाची शासकीय महापूजा मराठा आरक्षण आंदोलनाचे चेहरा बनलेले मनोज जरांगे पाटील यांच्या हस्ते सपत्नीक करावी, अशी मागणी मराठा क्रांती मोर्चाचे राज्य समन्वयक रामभाऊ गायकवाड यांनी केली आहे.

"मराठा समाजावर प्रेम असेल तर मनोज जरांगे पाटील व त्यांच्या कुटुंबीयांना बोलावून त्यांच्या हस्ते विठ्ठलाची महापूजा करावी. त्यानंतरही महापूजेसाठी येणार असाल तर मराठा समाज काय आहे, तुम्हाला माहिती आहे. बीड व जालना जिल्ह्यातील आमदारांचे काय काय झाले आहे. तुम्ही पाहिले असेल. तुम्हाला डेंगी झाला आहे. त्यामुळे पंढरपूरला येण्याचे धाडस करू नका. आरक्षण मिळत नाही तोपर्यंत पंढरपूरच काय राज्यात कुठेही फिरू देणार नाही", असा इशारा गायकवाड यांनी अजित पवार यांना उद्देशून दिला आहे.

तर कार्तिकी एकादशीची विठ्ठलाची शासकीय महापूजा करण्याच्या मागणीवर मनोज जरांगे यांनी आज माध्यमांशी बोलताना प्रतिक्रिया दिली आहे. यावेळी बोलताना ते म्हणाले की, 'कार्तिकी पूजा मी करावी हे ऐकून मी भरून पावलो'.

'कार्तिकी पूजा मी करावी हे ऐकून मी भरून पावलो, मला बोलले हेच खूप झालं', असं जरांगे पाटील म्हणालेत. समाजाची भावना आणि देवस्थानाची भावना याचरणी मी नतमस्तक होतो. मला दर्शन झाल्यासारखं झालं आहे. मी आताच भरून पावलो असंही जरांगे पुढे म्हणालेत.

तर आग्रह जास्तच वाढला तर जाणार का? या पत्रकांराच्या प्रश्नावर जरांगे म्हणाले, मला आत्ताच पुजा झाल्यासारखं वाटलं, मला याचं समाधान वाटलं. ते म्हणाले तेच खूप झालं, आपल्याला तशी काही अपेक्षा नाही असंही जरांगे पुढे म्हणाले आहेत.