उमरगा - मराठा समाजाला आरक्षण देण्यासाठी सरकारने मराठा समाजाची दिशाभूल केल्याची खंत मनात धरून समाजसेवक विनायकराव पाटील यांनी जीवंत समाधी घेतली होती मात्र मनोज जरांगे पाटील यांची दुरध्वनीद्वारे मध्यस्थी केल्याने पोलीस प्रशासनाने श्री. पाटील यांना जीवंत समाधी घेण्यापासून रोखले.

मनोज जरांगे यांच्या मराठा आरक्षण उपोषणाला पाठींबा देण्यासाठी श्री. पाटील यांनी  कवठा ग्रामस्थांच्या वतीने २५ ऑक्टोबर पासून अमरण उपोषण सुरू केले होते. उपोषण कालावधी दरम्यान श्री. पाटील  मराठा समाजाला आरक्षण नाही मिळाल्यास तीन नोव्हेंबरला जीवंत समाधी घेण्याचा निर्धार केला होता. सलग सात दिवस अमरण उपोषण केल्यामुळे पाटील यांची प्रकृती खालावली होती. जीवंत समाधी घेण्याच्या निर्धारावर पाटील ठाम असल्याने समाधी घेण्याची तयार पूर्ण झाली होती.

शुक्रवारी ठरल्याप्रमाणे उपोषणस्थळी कवठा व परिसरातील हजारोच्या संख्येने मराठा समाज बांधव सहभागी झाले होते. टाळ मृदंगाच्या गजरात श्री. पाटील समाधी स्थळावर जाऊन समाधिष्ठ झाले. या वेळी प्रशासनाची व उपस्थित ग्रामस्थांची एकच धांदल उडाली होती, या वेळी श्री. जरांगे यांनी श्री. पाटील यांच्याशी दुरध्वनीद्वारे संवाद साधला. तसेच उपविभागीय पोलीस अधिकारी रमेश बरकते, नायब तहसीलदार रतन काजळे, पोलीस निरीक्षक डि. बी. पारेकर, शितल पाटील, शहाजी पाटील, विजयकुमार सोनवणे आदि सह ग्रामस्थांनी व महिलांनी विनवणी करून, मध्यस्थी करून श्री. पाटील यांना समाधी घेण्यापासून थांबविले.

उपोषण कालावधि दरम्यान श्री. पाटील यांची प्रकृती खालावली असून त्यांच्यावर लातूर येथील डॉ. राठोड यांच्या रुग्णालयात वैद्यकिय उपचार सुरु करण्यात आले आहेत. आगामी काळात मराठा समाजाच्या आरक्षणाचा लढा कायम रहाणार असल्याचे त्यांनी सांगितले.  मनोज जरांगे यांच्या नेतृत्वाखाली आगामी काळात समाजाच्या विविध प्रश्नाबाबत लढा सुरुच रहाणार असल्याचे सांगुन श्री. पाटील यांनी बालकांच्या हस्ते पाणी घेऊन उपोषण मागे घेतले.

विकास पाटील, मलंग गुरुजी, व्यकंटराव सोनवणे, नितीन पाटील, अलका माने, शोभा सोनवणे, अक्षरबाई सोनवणे, शशिकला पाटील यांच्यासह  कवठा ग्रामस्थ, भजनी मंडळाच्या महिला मोठ्या संख्यने उपस्थि होत्या.