नांदेड : पोलिस शिपाई भरती पूर्व परीक्षा प्रशिक्षण योजनेंतर्गत" राज्यातील अल्पसंख्याक समाजातील इच्छुक उमेदवारांना शासनामार्फत विनामुल्य पोलिस शिपाई भरती पुर्व परीक्षा प्रशिक्षण देण्यात येणार आहे. अल्पसंख्याक समाजातील उमेदवारांकडून प्रशिक्षणासाठी अर्ज मागविण्यात येत असून यासंदर्भात निवड चाचणीसाठी सोमवार ता. १९ नोव्हेंबर रोजी सकाळी ११ वाजता जिल्हा मुख्यालयातील पोलीस परेड ग्राऊंड येथे अर्ज आणि सर्व कागदपत्रांच्या छायांकित प्रती, दोन पासपोर्ट फोटोसह उपस्थित रहावे, असे आवाहन जिल्हाधिकारी यांनी केले आहे.

उमेदवारांच्या निवडीसाठी अटी व शर्ती पुढील प्रमाणे राहतील. प्रशिक्षणार्थीचे वार्षिक कौटुंबिक उत्पन्न दोन लाख ५० हजार रुपयापेक्षा जास्त नसल्याचा पुरावा. उमेदवार अल्पसंख्यांक मुस्लिम, ख्रिश्चन, बौद्ध, शीख, पारसी, जैन आणि ज्यु या समाजातील असावा. उमेदवार हा १८ ते २८ या वयोगटातील असावा. उमेदवारांची उंची पुरुष १६५ से.मी. व महिला १५५ से. मी., छाती पुरुष ७९ सेमी. फुगगवून ८४ से.मी. असावी. उमेदवार इयत्ता १२ वी उत्तीर्ण असावा. उमेदवारांनी शैक्षणिक अर्हता, आधार कार्ड इत्यादी कागदपत्रांच्या सत्यप्रती अर्जासोबत देणे आवश्यक राहील. उमेदवार शारीरिकदृष्ट्या निरोगी व सक्षम असावा.

प्रशिक्षणाचे स्वरुप : निवडलेल्या उमेदवारांना एकुण दोन महिने (५० दिवस) प्रशिक्षण दिले जाईल.  निवडलेल्या प्रत्येक प्रशिक्षणार्थीस प्रशिक्षणा दरम्यान एक हजार ५०० रुपये प्रतीमाह प्रमाणे विद्यावेतन देण्यात येईल. मैदानी प्रशिक्षणानंतर संस्थेमार्फत चहापान व अल्पोपहार, गणवेश साहित्यासाठी गणवेश, बुट, मोजे, बनियन आदीसाठी एक हजार रुपये एवढी एक रक्कमी अनुदान देण्यात येईल. निवडलेल्या प्रशिक्षणार्थींना प्रशिक्षणादरम्यान निवासाची व्यवस्था स्वत: करावी लागेल, असे प्रसिद्धी पत्रकात म्हटले आहे.