नवी दिल्ली : मराठवाड्याच्या उद्योग क्षेत्राला गती देण्यासाठी जालना येथे होणारा मल्टिमॉडेल लॉजिस्टिक पार्क अत्यंत महत्वाचा ठरेल असा विश्‍वास केंद्रीय भूपृष्ठ वाहतूक मंत्री नितीन गडकरी यांनी यावेळी व्यक्त केला.

ड्रायपोर्ट अंतर्गत मल्टिमॉडेल लॉजिस्टिक पार्क उभारण्यासाठी केंद्रीय मंत्री व राज्यमंत्री, महाराष्ट्राचे मंत्री व खासदार यांच्या उपस्थितीत आज महामार्ग लॉजिस्टिक मॅनेजमेंट लिमिटेड आणि जवाहरलाल नेहरू पोर्ट ॲथॉरिटी यांच्यात सामंजस्य करारावर स्वाक्षऱ्या झाल्या. गडकरी यांच्या निवासस्थानी करार झाला. यावेळी जलमार्ग मंत्री सर्वानंद सोनोवाल, भूपृष्ठ वाहतूक राज्यमंत्री जनरल व्ही.के.सिंह, अर्थ राज्यमंत्री डॉ.भागवत कराड, रेल्वे राज्यमंत्री रावसाहेब दानवे आदी उपस्थितीत होते.

हा प्रकल्प मराठवाड्यासह

आणि विदर्भाच्या विकासाची गती वाढवणारा ठरेल. या प्रकल्पाद्वारे राष्ट्रीय महामार्ग, रेल्वे आणि जलमार्गाच्या माध्यमातून शेती व उद्योजकांच्या मालाची सुकर व गतीने निर्यात होण्यास मदत होईल,असे गडकरी यांनी सांगितले.

४५० कोटींचा मल्टिमॉडेल लॉजिस्टिक पार्क

भारतमाला योजनेंतर्गत देशभरात महत्त्वाच्या ठिकाणी मल्टिमॉडेल लॉजिस्टिक पार्क विकसित केले जात आहेत. यामध्ये जालन्याचा समावेश करण्यात आला असून या प्रकल्पाची किंमत ४५० कोटी रुपये आहे. या प्रकल्पामुळे जालना आणि औरंगाबाद यांच्यासह मराठवाड्यातील सर्व जिल्हे याशिवाय बुलढाणा भागातील व्यापार उद्योगातील मालाची वाहतूक अतिशय वेगवान आणि अत्यंत कमी खर्चात होईल. औद्योगिक वसाहतीतील सर्व परिसर जोडण्यासाठी जालना महत्त्वपूर्ण केंद्र निर्माण होत असून, यामुळे स्थानिक लोकांना रोजगार उपलब्ध होईल आणि औद्योगिक विकासाला चालना मिळणार आहे. रस्ते, रेल्वे मार्ग, दळणवळण, गोदामे, उद्योगातील कच्चा, पक्का माल साठा करून ठेवण्यासाठी मोठी स्टोअर्स गोदामे, कस्टम क्लिअरन्सची व्यवस्था या ठिकाणी उपलब्ध करून देण्यात येणार आहे. या संदर्भात आजचा हा सामंजस्य करार महत्त्वपूर्ण ठरणार आहे.