उस्मानाबाद : 93 व्या अखिल भारतीय साहित्य संमेलनाच्या निमित्ताने शहरातील सार्वजनिक ठिकाणच्या ओसाड भिंती बोलक्‍या झाल्या आहेत. मंगळवारी (ता. सात) शहरातील विद्यार्थ्यांसह राज्यभरातून आलेल्या कलाकारांनी सार्वजनिक भिंतीवर आकर्षक चित्र रेखाटून सामाजिक प्रबोधन केले. 

उस्मानाबादकर सज्ज 
93 वे अखिल भारतीय मराठी साहित्य संमेलन शुक्रवारपासून (ता. 10) सुरू होत आहे. राज्यासह देशभरातून मराठी भाषक संमेलनात हजेरी लावणार आहेत. त्यांच्या स्वागतासाठी उस्मानाबादकर सज्ज झाले आहेत.

हे वाचाच- मोबाइलमध्ये इंटरनेट वापरताय? गूगलच्या या सेटिंग्ज माहिती हव्याच! 

साहित्य संमेलनाच्या निमित्ताने उस्मानाबादेत आगळावेगळा प्रयोग राबवून शहरातील सार्वजनिक ठिकाणच्या ओसाड भिंतींवर विद्यार्थ्यांनी आकर्षक चित्रे रेखाटली आहेत. पर्यावरणाचे रक्षण करा, पाण्याचे मोल अनमोल, वृक्षलागवडीसह वृक्षसंवर्धनाची गरज असा सामाजिक संदेश देत समाजप्रबोधन केले जात आहे. तसेच संत गोरोबाकाकांची महती सांगणारा मजकूर अधोरेखित करीत विद्यार्थ्यांनी ऐतिहासिक घटनांना उजाळा दिला. साहित्य संमेलनातील लेखनीचे महत्त्वही या निमित्ताने विद्यार्थ्यांनी दर्शनी भागावर मांडले आहे. 

जाणून घ्या - पेशव्यांचा हा मुलगा का झाला मुस्लीम? 

आगळावेगळा प्रयोग 
शहरातील सर्व भागातील ओसाड भिंती बोलक्‍या करीत आगळावेगळा प्रयोग राबविल्याने विद्यार्थ्यांवर कौतुकाचा वर्षाव होत आहे. मंगळवारी दिवसभर विविध शाळांतील विद्यार्थी हातात कुंचला घेत आकर्षक चित्र रेखाटण्यात व्यस्त असल्याचे दिसून आले. सकाळपासूनच विद्यार्थ्यांची लगबग सुरू होती. दुपारच्या सत्रापर्यंत शहरातील संमेलनस्थळाच्या भिंती आकर्षक दिसत होत्या. शहरातील बोलक्‍या भिंती संमेलनाचे आकर्षण ठरत आहेत.