जालना : शहरातील कुंडलीका नदीच्या काठावर असलेल्या एका मंदिर परिसरात तरुणाचा खून झाल्याची घटना गुरुवारी (ता.25) सकाळी 11 वाजता उघडकिस आली.  कुमार शरदचंद्र झुंनजुर (वय 28 रा. लक्ष्मीनारायण पूरा) असे मयतांचे नाव आहे.

दरम्यान स्थानिक गुन्हे शाखेने तपासाचे चक्र फिरवित अवघ्या दोन तासात संशयितास  अटक केली आहे. विजय तुळशिराम मुंगसे ( वय 30) असे संशयित आरोपीचे नाव आहे. पैशांच्या वादतुन हा खून झाल्याच तपासात उघड झालं आहे.

शहरातील सिद्धि विनायकनगरच्या पाठिमागे मल्लावं समाजाचे तुळजाभवानी मातेचे मंदिर आहे. हा भाग  तसा अडगळीचा आहे. याच मंदिराच्या आवारात  गुरुवारी (ता.25) सकाळी 11 वाजण्याच्या सुमारास एक तरुणाच्या पोटात चाकू खुपसुन खून झाल्याचे घटना उघडकिस आली. पोलिसांनी मृतदेहाची तपासणी केल्यानंतर पॅनकार्डवरुन हा मृतदेह कुमार शरदचंद्र झुंनजुर (वय 28 रा. लक्ष्मीनारायण पूरा) याचा असल्याचे उघडकिस आले.  मयत कुमार झुंनजुन याच्या पोटात चाकूचे पाच ते सहा वार केल्यानंतर पोटात खुपसलेला चाकू तसेच होता. या घटनेची माहिती मिळाल्यानंतर प्रथम स्थानिक गुन्हे शाखेचे पोलिस निरीक्षक राजेंद्रसिंह गौर हे आपल्या पथकासह घटनास्थळी दाखल झाले होते.  त्यानंतर  पोलिस उपअधिक्षक (गृह) अभय देशपांडे, उपविभागीय पोलिस अधिकारी राहुल गायकवाड, कदीम जालना पोलिस ठाण्याचे पोलिस निरीक्षक संजय लोहकरे यांच्यासह  फिंगर प्रिंट, श्वास पथक घटनास्थळी दाखल झाले होते. 

दरम्यान स्थानिक गुन्हे शाखेचे पोलिस निरीक्षक राजेंद्रसिंह गौर यांनी तपासाचे चक्र फिरवित संशयित आरोपी विजय तुळशिराम मुंगसे (वय 30) याला अवघ्या दोन तासात ताब्यात घेतले आहे. विजय मुंगसे याने व्याजाने घेतलेले एक लाख रुपये कुमार झुनजुन याच्याकडे ठेवण्यासाठी दिले होते. मात्र ठेवण्यासाठी दिलेले पैसे मागितल्यानंतर कुमार झुंनजुन याने पैसे हरवल्याचे सांगितले. या पैशावरुन झालेल्या वादातुन हा खून  केल्याची  काबुली संशयित आरोपी विजय मुंगसे यानी दिल्याचे पोलिसांनी सांगितले आहे.