उस्मानाबाद : कोरोनाच्या वाढत्या प्रभावाचा विचार करुन जिल्हा प्रशासनाने जिल्ह्यामध्ये निर्बंध घालण्यास सूरुवात केली आहे. रविवारी जनता संचारबंदी तसेच सर्व आठवडे बाजार बंद करण्याचा निर्णय प्रशासनाने बुधवारी (ता.दहा) घेतले आहे. जिल्हाधिकारी यांनी आदेशाचे पत्र काढले असुन १२ मार्चपासून ही कार्यवाही करण्यात येणार असल्याचे आदेशात म्हटले आहे. जिल्ह्यामध्ये शुक्रवारपासून (ता.१२) पुढील आदेशापर्यंत निर्बंध लागू करण्यात आले आहेत. यामध्ये जिल्ह्यातील सर्व आठवडे बाजार पुढील आदेशापर्यंत बंद करण्यात येत आहेत.

संपूर्ण जिल्ह्यात रविवारी जनता कर्फ्युचे पालन करण्यात यावे, या दिवशी सर्व दुकाने, बाजारपेठा बंद राहणार आहेत. यामध्ये फक्त रुग्णालयाशी सबंधित घटकांना सवलत देण्यात आली आहे. जिल्ह्यातील सर्व धार्मिकस्थळे, प्रार्थनास्थळे, मंदिरे पुढील आदेशापर्यंत दर रविवारी बंद राहणार आहेत. धार्मिक विधीमध्ये पाचपेक्षा अधिक व्यक्तींना उपस्थित राहण्यास परवानगी असणार आहे. तसेच धार्मिकस्थळांच्या ठिकाणी नो मास्क नो एंट्री नियमाची काटेकोरपणे अंमलबजावणी करण्याचे आदेशात म्हटले आहे.

जीम, व्यायामशाळा, क्रीडा संकुले, खेळाची मैदाने, तरण तलाव आदी ठिकाणी ५० टक्के क्षमतेने वैयक्तिक सरावासाठी चालू ठेवण्यास परवानगी असेल सामाजिक अंतराचे पालन करणे अनिवार्य करण्यात आले आहे. मोठ्या स्पर्धा आयोजित करण्यास तसेच प्रेक्षकांना उपस्थित राहण्यास परवानगी असणार नाही. सर्व संमेलने, उपोषण, आंदोलने, निर्दशने, मोर्चा आदी पुढील आदेशापर्यंत करता येणार नाहीत. भाजीमंडईमध्ये सामाजिक अंतराचे पालन होईल.

सबंधित स्थानिक स्वराज्य संस्थांनी आवश्यक कार्यवाही करण्याबाबत आदेशामध्ये म्हटले आहे. १५ मार्चपासून जिल्ह्यातील सर्व मंगल कार्यालये, फंक्शन हॉल, लॉन्स पुढील आदेशापर्यंत बंद राहणार आहेत. जिल्ह्यातील सर्व नगरपरिषदा व पंचायतींमध्ये दहा मार्चपासुन पुढील आदेशापर्यंत नऊ ते पहाटे पाच या कालावधीत रात्रीची संचारबंदी राहणार आहे. या कालावधीत सर्व अत्यावश्यक बाबी वगळुन व्यक्तींच्या हालचालींना कडक प्रतिबंध राहणार असल्याचे आदेशात म्हटले आहे.

संपादन - गणेश पिटेकर