उस्मानाबाद : व्यवहार होत नसल्याने जिल्हा मध्यवर्ती सहकारी बँकेच्या जिल्ह्यातील नऊ शाखा बंद कराव्या लागल्या आहेत. त्या अन्य शाखांत विलीन केल्या आहेत. पुढील काही दिवसात आणखी १५ शाखा बंद करण्याचे संकेत आहेत. डबघाईला आलेल्या या बँकेला बळ देण्याची गरज असून जिल्ह्यातील राजकीय पुढाऱ्यांनी यासाठी प्रयत्न करावा, असा सूर सर्वसामान्यांतून व्यक्त होत आहे.

जिल्हा मध्यवर्ती सहकारी बॅंक ही ग्रामीण भागातील सामान्यांची अर्थवाहिनी मानली जाते. याच अर्थवाहिनीने अनेकांच्या व्यवसायाला उभारी दिली आहे. आता या येथील अर्थवाहिनीची गती मंदावत असल्याचे चित्र आहे. जिल्हा बँकेची आर्थिक स्थिती फारशी चांगली नाही. गेल्या अनेक दिवसांपासून जिल्ह्यातील काही शाखांत तर व्यवहारच होत नाहीत. अनेकजण इतर बॅंकांकडे वळले आहेत. विशेष म्हणजे सध्या केवळ निराधारांचे पगार देणारी बँक म्हणूनच जिल्हा बँकेची ओळख उरली आहे. गेल्या दहा वर्षांपासून याच गरिबांच्या आधारावर बँकेच्या शाखांची वाटचाल सुरू आहे. निराधारांना मिळणारे मानधन बँकेत जमा होत असल्याने काही शाखांचा डोलारा तरला आहे. मात्र वाढता खर्च, महागाईत खर्च परवडत नसल्याने बँकेने नऊ शाखा बंद करण्याचा निर्णय झाला.

राबवली वसुली मोहीम, पण..

आर्थिक स्थिती सुधारण्यासाठी बँकेने वसुली मोहीम राबविली होती. अनेक पुढाऱ्यांनी परतफेडीपोटी धनादेश दिले आहेत. अनेक संस्थांचे धनादेश वटलेले नाहीत. असे पुढारी, संस्था कोणत्या आहेत, असा प्रश्‍न सामान्य ग्राहकांकडून विचारला जात आहे. बॅंकेची स्थिती सुधारण्यासाठी आता कोण पुढाकार घेणार, असाही प्रश्न आहे.

बॅंकेच्या या शाखा बंद

उस्मानाबाद जिल्हा बॅंकेच्या बंद झालेल्या शाखा अशा ः कंसात दुसऱ्या शाखेत विलीन झालेले ठिकाण दिले. रुईभर (मार्केट यार्ड, उस्मानाबाद), धानुरी (माकणी), कवठा (नारंगवाडी), होर्टी (नळदुर्ग), नंदगाव (जळकोट), तांदूळवाडी (शेळगाव), शिराळा (आसू), इंदापूर (वाशी), अंतरगाव (वालवड).

जिल्हा बँकेची आर्थिक स्थिती चांगली नाही. अनेक कर्मचारी निवृत्त झाले आहेत. उर्वरित कर्मचाऱ्यांवर सर्वच शाखा सुरू राहून शकत नाहीत. शिवाय अनेक शाखांतील व्यवसायही कमी आहे. त्यामुळे अशा शाखा बंद करण्याचा निर्णय घेतला आहे.

- विजय घोणसे-पाटील, व्यवस्थापकीय संचालक, जिल्हा बँक, उस्मानाबाद