अणदूर (जि. उस्मानाबाद) : कोरोनाच्या संकटामुळे फळे, भाजीपाला, फुले उत्पादक अडचणीत आहेत. लाखमोलाची जरबेराची फुले जनावरांना खायला घालावी लागत असल्याने या भागातील एका शेतकऱ्याचे लाखो रुपयांचे नुकसान झाले आहे. कर्ज कसे फेडावे या विवंचनेत ते आहेत.

अनेक शेतकरी आधुनिक पद्धतीने शेती करीत उत्पन्नवाढीसाठी प्रयत्न करीत आहेत. गेल्या काही वर्षांपासून फुलशेतीचा प्रयोग करीत आहेत. चिवरी (ता. तुळजापूर) येथील शिवाजी माणिक शिंदे यांनी बँकेकडून नऊ लाख रुपये कर्ज, उसनवारी करून २५ लाख रुपये खर्चून २० गुंठे क्षेत्रात पॉलिहाऊस उभारून जरबेरा फुलांची लागवड केली. त्यासाठी त्यांनी पुण्याहून लाल माती व १२ हजार ५०० जरबेराची रोपे आणली. बाग चांगली जोपासली. फेब्रुवारीपासून फुले येऊ लागली.

मराठवाड्याच्या इतर बातम्या वाचण्यासाठी - क्लिक करा

फेब्रुवारी ते २० मार्चपर्यंत जवळपास तीन लाखांची फुले हैदराबाद, पुणे येथे विक्री केली. लग्नसराइत फुलांना मोठी मागणी असते. त्यामुळे यंदा चांगले उत्पन्न मिळणार अशी अपेक्षा शेतकऱ्यांना होती. मात्र कोरोनामुळे लॉकडाउन झाल्याने बाजारपेठेअभावी फुले जागेवरच कोमेजू लागली.

फुलांचे करायचे काय, म्हणून त्यांनी चार फुले तोडून जनावरांपुढे टाकली. ती जनावरांनी खाल्ल्यामुळे महिनाभरापासून ते फुलांचा चारा म्हणून वापर करू लागले आहेत. या महिनाभरात त्यांना सुमारे सात ते आठ लाख रुपये उत्पन्न अपेक्षित होते. कोरोनामुळे त्यावर पाणी फेरले. बँकेचे कर्ज, उसनवारी कशी फेडावी, याची विवंचना आहे.

महाराष्ट्रातील इतर बातम्या बाचण्यासाठी - क्लिक करा

कृषी विभागाने याचा तत्काळ पंचनामा करून पीडित शेतकऱ्यांस कर्ज रकमेवरील व्याज माफ करून आर्थिक मदत करण्याची मागणी शासनाकडे केली आहे.