उमरगा (जि. उस्मानाबाद) : कोरोना विषाणू संसर्गाचा फैलाव वाढण्याच्या भीतीने संपूर्ण जग हादरले आहे. राज्याची राजधानी असलेल्या मुंबई उपनगरासह पुणे येथे या आजाराची कमालीची भीती निर्माण झाल्याने उमरगा येथील एका व्यक्तीने लॉकडाउनमुळे वाहतूक व्यवस्था बंद असल्याने चक्क पायी गाव गाठले. सोमवारी (ता. चार) सकाळी हडपसर परिसरातून पायी निघालेली ही व्यक्ती सुमारे तीनशे किलोमीटरचे अंतर पायी पार करीत शुक्रवारी (ता. आठ) दुपारी बारा वाजता गावात पोचली.

ग्रामीण भागातील हजारो तरुण, रोजंदारी मजूर रोजीरोटीसाठी मुंबई, पुणे शहरांत गेल्या अनेक वर्षांपासून काम करीत आहेत. कोरोना संसर्गाचा प्रादुर्भाव रोखण्यासाठी केंद्र व राज्य सरकारने लॉकडाउनचा निर्णय घेतला. तब्बल दीड महिन्यापासून लॉकडाउन सुरू आहे. महामंडळाच्या व खासगी बसही बंद आहेत.

हेही वाचा - देश लॉकडाऊन न करताही कोरोनाशी लढा, वाचा या देशाची कहाणी...

उमरगा येथील ४६ वर्षीय माधव मुळे यांचे शहरात सलून होते. घरची आर्थिक स्थिती नाजूक असल्याने त्यातून मिळणाऱ्या मिळकतीतून प्रपंच भागत नव्हता. त्यामुळे गेल्या पाच-सहा वर्षांपासून ते उदरनिर्वाहासाठी पुणे शहरात गेले होते. हडपसर भागात ते एका हाऊसिंग सोसायटीत वॉचमन म्हणून कामाला लागले़ मात्र गेल्या महिनाभरात पुण्याच्या विविध भागांत कोरोनाबाधितांची संख्या वाढली आहे.

या आजारापासून आपण सुरक्षित राहू की नाही या भीतीमुळे त्यांनी गावाकडे जाण्याचा निर्णय घेतला; मात्र जाण्यासाठी वाहन नसल्याने गावाकडे पायी जाण्याचा निश्चय केला अन्‌ सोमवारी (ता. चार) सकाळी हडपसर येथून ते पायी निघाले. उन्हाचे चटके सोसत, रात्रीच्या गडद अंधारातही गावाकडे जाण्याचा प्रकाशमय मार्ग शोधत त्यांनी शुक्रवारी दुपारी बारा वाजता उमरगा गाठले. 

दरम्यान, शहरात आल्यानंतर पहिल्यांदा त्यांनी उपजिल्हा रुग्णालयात तपासणी करून घेतली. डॉक्टर्सनी ताप, खोकला नसल्याचा रिपोर्ट देऊन हातावर होम क्वारंटाइनचा शिक्का मारला. त्यानंतरही त्यांनी इन्स्टिट्युशनल क्वारंटाइनमध्ये राहण्याची इच्छा व्यक्त केल्याने पालिकेच्या कर्मचाऱ्यांमार्फत श्री. मुळे यांना श्री छत्रपती शिवाजी महाविद्यालयाच्या वसतिगृहात ठेवण्याचे नियोजन केले जात होते.