उस्मानाबाद : ग्रीन झोनमध्ये असलेल्या उस्मानाबाद जिल्ह्यातील नागरिकांना आता आठवड्यातून तीन दिवस केवळ पाच तास किराणा व भाजीपाला मिळणार आहे. परिणामी अचानक नागरिकांची गर्दी वाढून सोशल डिस्टन्सिंग फज्जा उडण्याची शक्यता आहे. जिल्हाधिकारी दीपा मुधोळ-मुंडे यांनी सोमवारी (ता. चार) हे आदेश काढले आहेत.

कोरोना विषाणूचा संसर्ग रोखण्यासाठी सोशल डिस्टन्स हा महत्त्वाचा घटक मानला जातो. त्यासाठी बाजारपेठेतील गर्दीवर नियंत्रण ठेवणे गरजेचे असते. उस्मानाबाद जिल्ह्यात गेल्या २१ दिवसांपासून एकही कोरोनाबाधित रुग्ण आढळून आलेला नाही. त्यामुळे जिल्ह्याचा समावेश ग्रीन झोनमध्ये करण्यात आला आहे. तर शेजारील लातूर आणि बीड हे दोन जिल्हे ऑरेंज झोनमध्ये समाविष्ट आहेत.

या दोन्ही जिल्ह्यांमध्ये नागरिकांना दररोज किराणा आणि भाजीपाला घेण्याची परवानगी आहे. मात्र उस्मानाबाद जिल्ह्याचा समावेश ग्रीन झोनमध्ये असतानाही येथे आठवड्यातून तीन दिवस केवळ पाच तास किराणा आणि भाजीपाला घेण्याची परवानगी नागरिकांना देण्यात आली आहे.

तळीरामांना गर्दी भोवली, लातुरात दारू विक्री बंद

जिल्हाधिकारी मुधोळ-मुंडे यांनी सोमवारी (ता. चार) हे आदेश काढले आहेत. याशिवाय इतर आस्थापनाही तीन दिवस केवळ पाच तास सुरू राहणार आहेत. कोणतीही वस्तू खरेदी करण्यासाठी केवळ पाच तासाचा अवधी मिळणार असल्याने नागरिकांची गर्दी त्या पाच तासाच्या कालावधीत पडणार असल्याचे संकेत मिळत आहेत.

ज्येष्ठांना मिळणार घरातच वैद्यकीय सल्ला

सोशल डिस्टन्स राखण्यासाठी जिल्हाधिकाऱ्यांनी हा निर्णय घेतला आहे. मात्र यातून सोशल डिस्टन्स पाळण्याऐवजी या प्रयत्नांचा फज्जा उडण्याचे संकेत आहेत. त्यामुळे गर्दी टाळण्यासाठी किराणा आणि भाजीपाला खरेदीची प्रक्रिया ही दररोज असावी, अशी भूमिका अपेक्षीत आहे. जिल्हाधिकारी मुधोळ मुंडे यांनी मात्र तीन दिवसांत पाच तासच किराणा आणि भाजीपाला घेण्याचे आदेश काढल्याने त्यांच्या या भूमिकेवर अनेक नागरिकांतून नाराजी व्यक्त होत आहेत. त्या पाच तासात जर गर्दी झाली तर याला जबाबदार कोण असाही प्रश्न सामान्य नागरिक विचारत आहेत.