उदगीर (जि. लातूर) : मराठ्यांच्या पराक्रमाच्या इतिहासाला उजाळा देण्यासाठी कोल्हापूर येथील इतिहास प्रेमींनी काढलेल्या उदगीर ते पानिपत शौर्ययात्रेची सुरुवात बुधवारी (ता.८) येथील ऐतिहासिक भुईकोट किल्ल्यातून झाली.

शहरातील शाहू महाराज सैनिकी विद्यालयातून किल्ल्यापर्यंत शोभायात्रा काढण्यात आली होती. कृष्णकांत चौक देगलूर रोड येथून शहरातील विविध शाळांच्या विद्यार्थ्यांनी इतिहासकालीन देखावे, ज्ञानदेव, तुकाराम, छत्रपती शिवराय, जिजाऊ यांचा वेश परिधान करून पदयात्रेत सहभाग नोंदवला.

पानिपतच्या लढाईसाठी मराठे ज्या मार्गाने पानिपतला गेले, त्याच मार्गाने ही यात्रा जाणार आहे. ज्या ठिकाणी पानिपत युद्धासाठी सैनिकांचे पडाव पडले होते, त्या ठिकाणी शौर्ययात्रेमध्ये नामवंत इतिहासतज्ञ पानिपत रणसंग्रामाची माहिती देणार आहेत.

ऐतिहासिक ठेवा - video : बघा यांच्याकडे आहेत 25 हजार ऐतिहासिक नाणी !

उदगीरहून ही यात्रा निघून परतूर, बुर्‍हाणपुर, देवास, गुणा, ग्वाल्हेर, कुरुक्षेत्र व पानिपत येथे 14 जानेवारी रोजी  पोहचणार आहे. 14 जानेवारीपर्यंत प्रत्येक मुक्कामाच्या ठिकाणी कोल्हापूर येथील युवक शिवकालीन मर्दानी खेळ सादर करणार आहेत. आपल्या युद्धातील सैनिकांचे, मावळ्यांचे कौशल्य कसे होते याचे प्रात्यक्षिक सादर करणार आहेत. 

उदगीरच्या विजयाच्या इतिहासाशिवाय पानिपतचा इतिहास पूर्णच होवू शकत नाही. म्हणूनच शौर्ययात्रेचा शुभारंभ उदगीर येथौन झाल्याचे यावेळी सांगण्यात आले. 

यांची विशेष उपस्थिती

यावेळी पानिपतकार विश्वास पाटील, कोल्हापूरहून आलेले उदय मोरे, रवी माने, अश्विनी भिडे, प्रकाश पाटील, इंद्रजित नागेशकर, पंडित पवार यांच्यासह उदगीर येथील बसवराज पाटील नागराळकर, जिल्हा परिषद अध्यक्ष राहुल केंद्रे, नगराध्यक्ष बसवराज बागबंदे, बाजार समितीचे सभापती सिद्धेश्वर पाटील, खरेदी-विक्री संघाचे सभापती भरत चांमले, मुख्याधिकारी भारत राठोड, पोलीस उपअधीक्षक मधुकर जवळकर, शहर पोलीस निरीक्षक महेश शर्मा, संयोजन समितीचे अध्यक्ष प्रा.डॉ .संजय मुळे, महानंदा सोनटक्के, सभापती मनोज पुदाले, दत्ताजी पाटील, रमेश अंबरखाने, डॉ दत्ता पाटील,  मोतीलाल डोईजोडे, धनंजय गुडसूरकर, अनिता येलमटे, चंदन पाटील नागराळकर, सुदर्शन मुंढे आदी यावेळी उपस्थित होते.

हेही वाचा - बीडचा सह्याद्री देवराई प्रकल्प महाराष्ट्रात पथदर्शी ठरेल - सयाजी शिंदे