परभणी : काही दिवसापासून बॉलीवुडमध्ये गाजणाऱ्या ‘तान्हाजी’ या हिंदी चित्रपटात दिग्गज कलावंताबरोबर परभणीच्या स्वप्निल सुंदर धोंडगे या तरूण कलावंताने सुध्दा ‘सत्या’ या छोटाश्या भुमिकेतून आपल्या अभिनयाद्वारे सर्वांचे लक्ष वेधून घेतले आहे.

जिल्हा परिषद प्रशालेतील शिक्षक सुंदर धोंडगे यांचा स्वप्निल हा मुलगा वसमत रस्त्यावरील गीतांजली विद्यालयात त्याने सातवीपर्यंत तेथून एकता कॉलनीतील गांधी विद्यालयात दहावीपर्यंत पाठोपाठ श्री शिवाजी महाविद्यालयात बी. ए. तृतीय वर्षापर्यंत शिक्षण पूर्ण केले. तेथून त्याने स्पर्धा परीक्षाच्या निमित्ताने पूणे गाठले. पण नाटकाची आवड होती. मालिकातील कामासाठी ऑडीशन देणे चालू होते. पूण्यात समर्थ अकादमी या थिअटर ग्रुपच्या माध्यमातून एकांकिका, राज्य नाट्य स्पर्धा व व्यावसायिक नाट्य सुध्दा सुरू केली. जय मल्हार या मालिकेसाठी ऑडीशन दिले होते. त्या मालिकेत सुध्दा छोटी भूमिका केली. 

हेही वाचा - रेल्वे फाटकाच्या अडथळ्यातून होणार सुटका

क्राईम पेट्रोलमध्ये पोलिसाची भुमिका
तो पुढे मुंबईत दाखल झाला. तेथून त्याने हिंदी मालिकामध्ये विशेषतः क्राईम पेट्रोलमध्ये पोलिसाची भुमिका बजाविण्यास सुरूवात केली. आणि एक दिवस त्यास अजय देवगण यांच्या ‘तान्हाजी’ या हिंदी चित्रपटासाठी संधी आली. सत्या या भुमिकेत त्याची निवड झाली. आणि त्याने अजय देवगण, सैफ अली खान, ओम राऊत या दिग्गज कलाकाराबरोबर काम करण्याची सुवर्ण संधी साधली. सध्या सोनी मराठी वाहिनीवरील स्वराज्य जननी जिजामाता,  अवधुत गुप्ते निर्मित कान्हा, शेंटीमेटल वगैरे मधून तो झळकत आहे. 

हेही वाचा व पहा - Video-Photos :  होट्टल महोत्सवासाठी शासनाकडून एक कोटी

परभणीने दिले अनेक दिग्गज कलावंत
परभणी शहर हे साहित्य नगरी म्हणून पूर्वीपासूनच परिचित आहे. हळूहळू या नगरीचे नाव आता नाट्य व चित्रपट क्षेत्रातही झळकत आहे. प्रसिध्द नाट्यकलावंत संकर्षण कऱ्हाडे, अजिंक्य राऊत यासह संगीतकार रोहित नागभिडे व इतर अनेक जणांनी नाट्य व चित्रपटात आपली चुणूक दाखवून परभणी शहराचा नावलौकीक केला आहे. 
या यादीत आता स्वप्नील धोंडगे याचे नावदेखील आले आहे. या तरूण व हरहुन्नरी कलाकारांमुळे परभणी आता साहित्यासह नाट्य चित्रपट क्षेत्रातही ओळखली जाऊ लागली आहे. परभणी आणखी अनेक नाट्य कलावंत आहेत त्यांनी त्यांची प्रतिभा जगासमोर आणली आहे. यामुळेच परभणी हे नाव देशाच्या नकाशावर आता ठळकपणे दिसू लागले आहे.