बीड : शहरासह नेकनूर भागातील जुगार, अवैध दारू धंद्यांवर छापे टाकून कारवाई करण्यात आली. यासाठी स्थानिक गुन्हे शाखेच्या पथकाने पुढाकार घेतला होता.

मंगळवारी स्थानिक गुन्हे शाखेचे पोलिस निरीक्षक सतीश वाघ यांना माहिती मिळाल्यावरून बीड बसस्थानक जवळ बालाजी ज्यूस सेंटर येथे छापा मारला. येथे ऑनलाइन चक्री जुगार खेळताना अजय अंकुश तावरे (रा. तुळजाईनगर, बालेपीर), सूर्य रमेश तावरे (रा. तुळजाईनगर बालेपीर), अमोल अंकुश आमटे (रा. खांडेपारगाव, ता. बीड), रामेश्वर प्रल्हाद लाटे (रा. ग्रामसेवक कॉलनी, बालेपीर, बीड), प्रभाकर दगडू आंधळे (रा. गुंदा वडगाव, ता. बीड), आनंद शेटे (रा. बीड) यांना ताब्यात घेण्यात आले. तसेच नवगण कॉलेज रोडवरील घुमरे कॉम्पलेक्स मधील गाळ्यात छापा टाकून युवराज श्रीमंत सुस्कर (रा. पिंगळे गल्ली, बीड) यास ताब्यात घेतले.

तिसरा छापा कडबा मंडई पेठ बीड भागात मारला. पत्र्याच्या शेडमध्ये ऑनलाइन चक्री जुगार खेळताना मोहमंद कैफ मोहमंद अबुबकर (रा. बाबाचौक इस्लामपुरा), शहेबाज अमजद सय्यद (रा. इस्लापुरा, बीड), उजेर मुजाहिद खान (रा. भालदारपुरा बाबा चौक, बीड), शेख फय्याज अब्दुल सलाम (रा. भालदारपुरा बाबा चौक, बीड) यांना ताब्यात घेण्यात आले.

याच भागात चक्री जुगारावर चौथा छापा मारुन अक्षय दीपक राऊत (रा. पिंगळेगल्ली, बीड) यास ताब्यात घेण्यात आले. वरील चार छाप्यांत १२ जणांना ताब्यात घेऊन त्यांच्याकडून दोन लाख ४३ हजार रुपयांचा मुद्देमाल जप्त करण्यात आला. शिवाजी नगर पोलिस ठाण्यात गुन्हा नोंद करण्यात आला. यानंतर राजपूत गल्ली, हिरालाल चौक येथे छापा टाकून सावन गिरीधरसिंह परदेशी यास विनापरवाना देशी दारुची विक्री करताना रंगेहाथ पकडून १० हजार ६०० रुपायांची देशी जप्त केली. त्याच्या विरोधात गुन्हा दाखल करण्यात आला.

तांदळवाडी घाट येथेही पोलिसांचा छापा

तालुक्यातील तांदळवाडी घाट येथे तिर्रट जुगार अड्ड्यावर छापा टाकून सुंदर भानुदास खोसे, बालासाहेब शेषराव काळे दोन्ही (रा. तांदळवाडी, ता. बीड), बाळू सुंदर टेकडे, बाळासाहेब मारुती लहाने, पप्पू विश्वनाथ जगताप (सर्व रा. अंधापुरी ता. बीड), बाळू सखाराम खाकरे (रा. सावरगाव, ता. बीड) मिळून आले. त्यांच्या ताब्यातून जुगाराचे साहित्य व रोख रक्कम असा एक लाख ७० हजार १५० रुपयांचा मुद्देमाल जप्त करण्यात आला. याच ठिकाणी अवैध दारू विक्री करण्यासाठी साठा करुन देशी, विदेशी दारू किंमत पाच हजार १४० रुपयांचा मुद्देमाल जप्त करुन दोन्ही प्रकरणी नेकनूर पोलिस ठाण्यात गुन्हा दाखल करण्यात आला.