पाथरी : शहरातील लेंडी नाल्यावरील कत्तलखान्यात मोठया प्रमाणात गोवंशाची कत्तल करण्यासाठी जनावरे आणल्याची माहिती मिळाल्यानंतर पोलिसांनी टाकलेल्या छाप्यात 40 जिवंत जनावरे आणि 5 क्विंटल गोवंश मास आढळून आले. ही घटना गुरुवारी (ता.२०) रोजी दुपारी ५ च्या सुमारास घडली.

पाथरी शहरातील लेंडी नाल्यावरील कत्तल खाण्यात बाहेर जिल्ह्यातून मोठ्या प्रमाणावर कत्तल करण्यासाठी जनावरे आणल्याची माहिती पोलिसांना मिळाल्यानंतर पोलीस निरीक्षक व्ही. डी. श्रीमनवार, सहायक पोलिस निरीक्षक के. बी. बोधगिरे, फौजदार आवेज मकसूद काजी यांनी आपल्या पथकासह कत्तल खाण्यावर दुपारी ५ च्या सुमारास छापा टाकला. यावेळी त्यांना ४० जिवंत जनावरे, व ५ क्विंटल गोवंशाचे मास आढळून आले. तेथे असलेल्या दोघांची पोलिसांनी कसून चौकशी केली. त्यांच्याकडून कोणतेही समाधानकारक उत्तर मिळाले नाही.

तसेच विशेष म्हणजे तेथील एकाही जनावरांचा दाखला त्यांच्याकडे आढळून न आल्याने ही जनावरे कत्तल करण्यासाठीच आणल्याचे सिद्ध झाले. त्यामुऴे पोलिसांनी प्राणी संरक्षण कायद्यानुसार शेख सुभान शेख सुलतान (रा.आझाद नगर, पाथरी),  मुखींद वहाब कुरेशी (रा. मुर्तुजा कॉलनी) यांना ताब्यात घेऊन त्यांच्यावर रात्री उशिरा गुन्हा दाखल करण्यात आला आहे.