हिंगोली : औंढा नागनाथ तालुक्यातील सिरला तांडा येथे हट्टा पोलिसांनी टाकलेल्या छाप्यात जिलेटीनच्या ३२१ कांड्या आणि ५०० डिटोनेटर सापडले असुन एका आखाड्यावरुन सोमवारी (ता.२८) सायंकाळी हे जिलेटिन व डिटोनेटर जप्त करण्यात आले आहेत. औंढा नागनाथ (Aundha Nagnath) तालुक्यातील सिरला तांडा शिवारामध्ये एका शेतात स्फोटक पदार्थ असल्याची माहिती हट्टा पोलिसांना मिळाली होती. त्यावरून पोलीस अधीक्षक राकेश कलासागर सहायक पोलिस अधीक्षक यतीश देशमुख यांच्या मार्गदर्शनाखाली हट्टा पोलीस ठाण्याचे सहायक पोलीस निरीक्षक गजानन मोरे, उपनिरीक्षक एस. एस. तावडे, जमादार भुजंग कोकरे, जीवन गवारी यांच्या पथकाने सोमवारी सायंकाळी एकनाथ राठोड यांच्या सिरला तांडा शिवारातील आखाड्यावर छापा टाकला. (Police Seized Jelatin Sticks, Detonator In Hingoli)

यावेळी आखाड्याची तपासणी केली असता एका कोपऱ्यामध्ये जिलेटिनच्या काड्याचा बॉक्स व डिटोनेटरचा बॉक्स लपवून ठेवल्याचे पोलिसांना आढळले. पोलिसांनी दोन्ही बॉक्स काढून पाहणी केली असता त्यामध्ये ३२१ जिलेटिनच्या कांड्या व ५०० डिटोनेटर आढळून आले. पोलिसांनी दोन्ही बॉक्स जप्त करून एकनाथ राठोड याच्या विरुद्ध हट्टा पोलीस ठाण्यात स्फोटक पदार्थ बाळगल्याप्रकरणी गुन्हा दाखल करून त्याला अटक केली आहे. दरम्यान या प्रकरणात पोलिसांनी अधिक चौकशी केली असता विहिरीच्या खोदकामासाठी जिलेटिनच्या कांड्या व डिटोनेटर आणण्यात आले होते.

मात्र शिल्लक राहिलेल्या कांड्या व डिटोनेटर योग्य पद्धतीने हाताळणी करून त्याचा साठा करणे आवश्यक होते. शिल्लक राहिलेल्या कांड्या शेतातील आखाड्यावर निष्काळजीपणाने ठेवण्यात आल्याचे चौकशीत निष्पन्न झाले. या प्रकरणात सहायक पोलीस निरीक्षक गजानन मोरे अधिक तपास करत आहेत.(Hingoli)