परभणी ः यंदा उन्हाळा सुरू होऊनही अद्याप पावसाळी वातावरणाचा अनुभव येत आहे. दोन दिवसांपुर्वी मराठवाड्यात गारपीट आणि अवकाळी पाऊस झाला. आता पुन्हा ता.२५ रोजी मराठवाड्यात हलक्या पावसाची शक्यता वसंतराव नाईक मराठवाडा कृषि विद्यापीठाने वर्तवली आहे. त्यामुळे यंदा अर्ध्या उन्हाळ्यात पावसाळ्याचा अनुभव येणार आहे.

ऑक्टोबर-नोव्हेंबर महिण्यात सलग २२ दिवस अतिवृष्टी
मागील काही दिवसांपासून मराठवाड्यात अवकाळी पावसाने मुक्काम ठोकला आहे. काही भागात गारपीट देखील झाली आहे. गत वर्षातील पावसाळा संपल्यानंतर ऑक्टोबर-नोव्हेंबर महिण्यात सलग २२ दिवस अतिवृष्टी झाली. त्यानंतर जानेवारी महिण्यात देखील ढगाळ वातावरण राहुन पावसाने हजेरी लावली. अख्खा हिवाळा ढगाळ वातावरणात संपला. आता मागील महिनाभरापासून उन्हाळ्यास सुरुवात झाली आहे, मात्र सातत्याने ढगाळ वातावरण निर्माण होत आहे. तसेच अधुन-मधुन पाऊस देखील पडत आहे.

हेही वाचा - नळजोडणी अर्ज, मालमत्ता वसूलीसाठी ‘या’ शहरात लिपीक नागरिकांच्या दारात

वाऱ्यामुळे फळबागा मोडुन पडल्या
सुरुवातीला ढगाळ वातावरणामुळे रब्बी हंगामातील पिकांच्या वाढीवर परिणाम झाला आहे. आता ही पिके काढणीला आली असता मागील काही दिवसांपासून अवकाळी पाऊस पडु लागला आहे. तसेच काही भागात गारपीट देखील झाली आहे. त्यामुळे रब्बी हंगामातील पिकांचे मोठे नुकसान झाले आहे. त्यासोबतच वाऱ्यामुळे फळबागा मोडुन पडल्या आहेत. हा पाऊस थांबताच आता पुन्हा पावसाचा इशारा आला आहे. त्यामुळे शेतकरी, फळबागायतदार धास्तावले आहेत. 

हेही वाचा - ‘कोरोना’ची भीती, ‘या’ महापालिकेतही ५०-५० चा फार्म्युला लागू

तुरळक ठिकाणी हलक्‍या स्‍वरूपाच्‍या पावसाची शक्‍यता
मराठवाड्यात पुढील पाच दिवसात आकाश स्‍वच्‍छ ते अंशत: ढगाळ राहुन ता.२५ मार्च रोजी हिंगोली, लातुर, नांदेड, उस्‍मानाबाद व परभणी जिल्‍ह्यात तुरळक ठिकाणी अतिशय हलक्‍या स्‍वरूपाच्‍या पावसाची शक्‍यता असल्याची माहिती वसंतराव नाईक मराठवाडा कृषि विद्यापीठाच्या ग्रामीण कृषि मौसम सेवा विभागाने दिली आहे.

याकडे द्या लक्ष...
हरभरा, ज्वारी, गहु पिकाची वाळल्‍यानंतर काढणी व मळणी करून सुरक्षित ठिकाणी साठवणूक करावी. ऑक्‍टोबरमध्‍ये लागवड केलेल्‍या ऊस पिकास वरखताची चौथी मात्रा ४० टक्के नत्र, ५० टक्के स्‍फुरद व ५० टक्के पालाश देऊन पाणी दयावे. ऊस पिकावरील पांढरी माशीच्‍या व्‍यवस्‍थापनासाठी क्‍लोरपायरीफॉस २० टक्के २० मिली प्रती १० लिटर पाण्‍यात मिसळून फवारणी करावी. संत्रावरील फुलपाखराची अळी दिसुन आल्‍यास याच्‍या व्‍यवस्‍थापनासाठी क्विनॉलफॉस २५ टक्के २० मिलीप्रती १० लिटर पाण्‍यात मिसळून फवारणी करावी. अवकाळी पाऊस, गारपीट यामुळे काही ठिकाणी बागेमध्‍ये झाडांच्‍या फांदया मोडल्‍या असल्‍यास त्‍या सिकेटरच्‍या साहयाने कापून टाकाव्‍यात. त्‍यानंतर त्‍वरीतत्‍यावर कार्बेन्‍डाझिम १० ग्रॅम प्रती १० लिटर पाण्‍यात मिसळून फवारणी करावी.