पिंपळगाव रेणुकाई (जि.जालना) - एकीकडे ढग, वारा, दुसरीकडे आषाढधारा अशी गत परिसरात दिसून आली. देहेड भागातच तीन दिवसांनंतर पुन्हा शुक्रवारी (ता. २६) पावसाने हजेरी लावली. दुसरीकडे पावसाची आतुरतेने वाट पाहणाऱ्या पिंपळगाव रेणुकाई भागातील शेतकऱ्यांचा पुन्हा हिरमोड झाला आहे. पावसाला सुरवात होणार असल्याची आशा मग निराशेत बदलली आहे. 

जालना जिल्ह्यात भोकरदन तालुक्यातील वरूड बुद्रुक, रेलगाव, देहेड, मुर्तड आदी भागांमध्ये तीन दिवसांपूर्वी मंगळवारी जोरदार पाऊस झाला होता. यावेळी उत्तर भाग पावसाने सोडून दिला होता. तीच पुनरावृत्ती पुन्हा शुक्रवारी पावसाने दाखवल्यामुळे शेतकरी चिंतातुर झाला आहे. भोकरदन तालुक्‍याच्या उत्तर भागात आजही केवळ वारा, ढगाळ वातावरण, विजांचा कडकडाट दिसून आला.

हेही वाचा : पीककर्जावर शेतकऱ्यांची मदार

सध्या पावसाची नितांत आवश्‍यकता असतानाही पाऊस पडत नसल्याने शेतकऱ्यांवरील संकट वाढत आहे. आधीच कडाक्‍याचे ऊन, पावसाचा पत्ता नाही अशात पिंपळगाव रेणुकाईसह शेलूद, लेहा, पारध, पद्मावती, धावडा, हिसोडा आदी भागांमध्ये सोयाबीन वगळता इतर पिकांची चांगली उगवण झालेली पिके सुकत चालली आहे. तर शुक्रवारी काही भागांत झालेल्या अल्प पावसाने पिकांचा धोका अधिक वाढला आहे.

हेही वाचा : कसे रुजावे बियाणे...

दरम्यान, वरूड बुद्रुक, रेलगाव, देहेड, मुर्तड परिसरात झालेल्या जोरदार पावसाने शेतात पाणी साचले आहे, तर वादळामुळे शेतकऱ्यांनी लागवड केलेली उन्हाळी मिरची पीक आडवे झाले आहे. या परिसरात सायंकाळी पाच वाजेपासून रात्री उशिरापर्यंत पावसाच्या सरींवर सरी कोसळत राहिल्या होत्या. 

वरूड बुद्रुक परिसरात शुक्रवारी सायंकाळी पावसाबरोबर वाराही सोसाट्याने वाहत होता. या पाऊस व वाऱ्याचा मिरचीच्या पिकाला फटका बसला आहे, शेतातील मिरची पीक जमिनीवर टेकले आहे. 
- योगेश वाघ, शेतकरी