परभणी : मराठवाड्यातील (Marathwada) काही जिल्ह्यात १ ते ३ ऑक्टोबर दरम्यान विजेच्या कडकडाटासह जोरदार पावसाची शक्यता प्रादेशिक हवामान केंद्र, मुंबई यांच्याकडून व्यक्त करण्यात आली असल्याची माहिती वसंतराव नाईक मराठवाडा कृषी विद्यापीठातील (Vasantrao Naik Marathwada Agriculture University) ग्रामीण कृषी मौसम विभागाच्यावतीने देण्यात आली आहे. गेल्या आठवड्यापासून संपूर्ण मराठवाड्याला पावसाने झोडपून काढले आहे. परभणी जिल्ह्यातील मोठे, मध्यम व लघु प्रकल्प पूर्ण क्षमतेने भरले आहेत. त्यामुळे गोदावरीसह जिल्ह्यातील सर्व छोट्या - मोठ्या नद्या तुटूंब भरून वाहत आहेत. गेल्या आठवड्यापासून हवामान (Rain Forecast In Marathwada) केंद्राकडून वर्तविण्यात येणारा अंदाज तंतोतंत खरा ठरत आहे. सोमवारी (ता.२७) व मंगळवारी (ता.२८) या दोन दिवसात संपूर्ण मराठवाड्यात संततधार सुरु होती. त्यामुळे पिकांचे मोठे नुकसान झालेले आहे. अनेक फळबागामध्ये पाणी शिरल्याने फळबागांचे नुकसान झाले आहे. कापुस, सोयाबीनच्या शेतात अजूनही पाणी साचलेले असल्याने सोयाबीन वाहून गेले आहे.

काही ठिकाणी पाण्यामुळे सोयाबीनच्या शेंगा झाडालाच नासल्याचे चित्र पाहावयास मिळत आहे. बुधवारी (ता.२९) सकाळपासून परभणी जिल्ह्यासह मराठवाड्यातील काही जिल्ह्यात सूर्यदर्शन झाले. त्यामुळे नागरिकांनी सुटकेचा नि:श्वास सोडला असला तरी आता परत ता. एक ऑक्टोबरपासून पावसाचा अंदाज वर्तविण्यात आला आहे. मुंबई येथील प्रादेशिक हवामान केंद्राच्यावतीने प्राप्त झालेल्या अंदाजानुसार एक ऑक्टोबर रोजी औरंगाबाद, जालना, परभणी, हिंगोली व बीड जिल्ह्यात तर दोन ऑक्टोबर रोजी औरंगाबाद, जालना बीड व परभणी जिल्ह्यात तसेच तीन ऑक्टोबर रोजी उस्मानाबाद व लातूर जिल्ह्यात तुरळक ठिकाणी वादळीवारा, विजांच्या कडकडाटासह पावसाची शक्यता आहे अशी माहिती वसंतराव नाईक मराठवाडा कृषी विद्यापीठातील ग्रामीण कृषी मौसम विभागा मुख्य प्रकल्प समन्वयक डॉ.के.के. डाखोरे यांनी दिली आहे.