परतूर (जि.जालना) -  हत्येसाठी सुपारी देणारा परतूरचा व्यापारी राजेश नहार याचा गोळ्या झाडून खून करण्यात आला. यात कारमधून जाणाऱ्या नहारच्या दिशेला दोन गोळ्या झाडण्यात आल्या. यातील दुसरी गोळी त्याच्या कानाखाली लागली, त्यातच तो गतप्राण झाला. शिंगाडेपोखरी फाटा (जि. जालना) येथे ही घटना शनिवारी (ता. 11) रात्री अकरा वाजता उघडकीस आली. 

हेही वाचा : जालना बनलाय गावठी बंदुकवाल्यांचा अड्डा? 

परतूर येथील व्यापारी राजेश नहार आधीच वादात सापडलेला होता. त्याने बांधकाम व्यावसायिक गौतम मुनोत आणि व्यापारी विमलराज सिंघवी यांच्या हत्येची सुपारी दिल्याचे स्थानिक गुन्हे शाखेने उघड केले होते; तसेच या दोन्ही प्रकरणांत राजेश नहार याला स्थानिक गुन्हे शाखेने अटक केली होती. या दोन्ही प्रकरणांचा सध्या तपास सुरू आहे. यादरम्यान शनिवारी (ता. 11) रात्री वाटूर-जालना महामार्गावरील परतूर तालुक्‍यातील शिंगाडेपोखरी फाटा येथे राजेश नहार याच्यावर कोणीतरी दोन गोळ्या झाडल्या. यातील एक गोळी त्याच्या कानाखाली लागली. त्यानंतर त्याला तत्काळ उपचारासाठी दाखल केले; मात्र त्याचा मृत्यू झाला होता.

हेही वाचा : जालन्याचे बिल्डर मुनोतही होते राजेश नहारचे टार्गेट 

दरम्यान, या घटनेची माहिती मिळताच परतूरचे पोलिस निरीक्षक शिरीष हुंबे यांनी तत्काळ घटनास्थळी धाव घेतली. त्यासोबतच अपर पोलिस अधीक्षक समाधान पवार, उपविभागीय पोलिस अधिकारी सोपान बांगर, स्थानिक गुन्हे शाखेचे राजेंद्रसिंह गौर यांच्यासह परतूरचे सर्व अधिकारी, कर्मचारी घटनास्थळी दाखल झाले. दरम्यान, रात्री उशिरापर्यंत याप्रकरणी गुन्हा दाखल झालेला नव्हता. 

दुचाकीस्वाराने गोळ्या झाडल्याचा अंदाज 
राजेश नहार हा कारने जात होता. तेव्हा त्यास दुचाकीस्वाराने थांबविले असावे. त्यानंतर कार रस्त्याच्या बाजूला थांबविल्यावर मारेकऱ्याने दोन गोळ्यांच्या फैरी झाडल्याचा प्रथमदर्शनी अंदाज पोलिसांनी वर्तविला आहे. दरम्यान, घटनास्थळी पोलिसांना झाडलेल्या गोळीचे अवशेषही सापडले.