घनसावंगी (जि.जालना) - लॉकडाउनमुळे मजुरांची परवड सुरू असून ठिकठिकाणी ते अडकले आहेत. पारडगाव (ता. घनसावंगी) येथे रेल्वेच्या कामासाठी आलेल्या मध्यप्रदेशातील मजुरांनाही कामाच्या ठिकाणी मुक्काम ठोकावा लागला आहे. तेथील खोपीतच महिलेची प्रसूती झाली. तिने गोंडस बाळाला जन्म दिला. 

पारडगाव येथील रेल्वेरूळाच्या कामासाठी मध्यप्रदेशातील मजूर आले आहेत. कोरोनामुळे लॉकडाउनमुळे त्यांना आपल्या गावी परतता आले नाही. त्यांना पटरीलगत जंगलात मुक्काम ठोकावा लागला.

हेही वाचा : नवऱ्याला भांडून गेली, कोरोनाला सापडली

ग्रामस्थ व प्रशासनातर्फे त्यांच्या खाण्यापिण्याचा प्रश्न सुटला. दरम्यान, या मजुरांतील मुन्नीबाई पवार हिला मंगळवारी मध्यरात्रीनंतर दोनच्या सुमारास प्रसवकळा सुरू झाल्या. दवाखान्यात नेण्यासाठी मजुरांनी धडपड सुरू केली; पण मार्ग सापडला नाही.

हेही वाचा :  लॉकडाऊनमध्ये मजुरांच्या हाताला मिळणार काम

अखेर खोपीतच सुखरूप प्रसूती झाली. मुन्नीबाईने गोंडस बाळाला जन्म दिला. 

पोषक आहार दिला 

याबाबत माहिती कळताच राजू स्वामी विभुते यांनी संबंधित महिलेसाठी आवश्यक पौष्टिक आहारासह वस्तू झोपडीत जाऊन दिल्या. वस्तू मिळताच महिलेचे डोळे पाणावले. ‘हमारे गाव तक जाने की व्यवस्था करो’ असा आग्रह तिने केला. 

आरोग्य सुविधा देणार 

पारडगाव येथे अडकलेल्या मजूर महिलेच्या प्रसूतीसंबंधी आरोग्य विभागाला सूचना दिल्या होत्या. महिलेच्या घरच्यांना परिसरातील आरोग्यसेविका व डॉक्‍टर्सचे मोबाईल क्रमांक दिले होते; परंतु रात्रीची वेळ असल्याने त्यांनी फोन केला नसेल; परंतु या महिलेला पुढील आरोग्य सुविधा देण्याच्या सूचना दिल्या आहेत. या भागात झालेल्या सर्वेक्षणात आरोग्यसेविका, आशा आदींना गर्भवतीसंदर्भात माहिती कशी मिळाली नाही, हेही पाहिले जाईल, असे तालुका आरोग्य अधिकारी डॉ. नागेश सावरगावकर यांनी सांगितले.