हिंगोली : एका १२ वर्षीय मुलीची गळा चिरून हत्या करण्यात आल्याची घटना गुरुवारी (ता. २१) सकाळी नांदुसा (ता. हिंगोली) येथे घडली. घटनेची माहिती मिळताच पोलिसांनी घटनास्थळी धाव घेतली असून पोलिसांना घटनास्थळी एक ब्लेड सापडली आहे. अज्ञात आरोपीचा पोलिस शोध घेत आहेत.

पोलिसांनी दिलेल्या माहितीनुसार, नांदुसा (ता. हिंगोली) येथे शिवाजी कांबळे यांचे कुटुंबीय राहतात. गुरुवारी सकाळीच शिवाजी कांबळे, त्यांची पत्नी, एक मुलगी व एक मुलगा शेतात गेले होते. तर घरी दुसरी मुलगी प्रियंका शिवाजी कांबळे (१२) व तिचा लहान भाऊ होता. 

हेही वाचा - कळमनुरीत सोशल डिस्टन्सिंगचा फज्जा

आरोपीने घरातून पोबारा केला

सकाळी सुमारे साडेदहा ते अकरा वाजण्याच्या सुमारास तिचा भाऊ बाहेर गेला होता. त्यानंतर अज्ञात आरोपीने घरातप्रवेश करीत एका खोलीच्या बाहेर प्रियंकाचा गळा कापून खून केला. त्यानंतर आरोपीने घरातून पोबारा केला. दरम्यान, काही वेळाने प्रियंका हिची बहीण शेतातून घरी आल्यानंतर तिला प्रियंका ही रक्ताच्या थारोळ्यात पडलेली दिसून आली.

जिल्हाभरात एकच खळबळ

 तिने तातडीने हा प्रकार शिवाजी कांबळे यांना कळविला. त्यानंतर शिवाजी कांबळे व इतर गावकऱ्यांनी घराकडे धाव घेतली. या घटनेची माहिती मिळताच पोलिसांनी घटनास्थळी भेट दिली. या वेळी घटना स्थळावर पोलिसांना एक ब्लेड आढळून आल्याचे सांगण्यात आले. या घटनेमुळे जिल्हाभरात एकच खळबळ उडाली आहे. या प्रकरणात पोलिसांनी काही जणांचे जबाव घेण्यास सुरवात केली आहे. दरम्यान, या खुनाचे नेमके कारण समजू शकले नाही.

घरात एकटीच असल्याचा घेतला गैरफायदा

घटना घडली तेव्हा प्रियंका कांबळे हिचा लहान भाऊ घराबाहेर गेला होता. त्यामुळे प्रियंका ही एकटीच घरी होती. याच वेळी अज्ञात आरोपीने प्रियंका हिची धारदार ब्लेडने गळा चिरून हत्या केली. दिवसाढवळ्या घटना घडल्याने जिल्हा या घटनेने हादरून गेला आहे.

मित्राचा चाकूने भोसकून खून

हिंगोली : वडिलांना शिवीगाळ केल्याच्या कारणावरून मित्रानेच मित्राचा चाकूने भोसकून खून केल्याची घटना बुधवारी (ता. २०) माथा (ता. औंढा नागनाथ) येथे घडली. याप्रकरणी औंढा नागनाथ पोलिस ठाण्यात गुन्हा दाखल करण्याची प्रक्रिया सुरू होती.

दोन दिवसांपूर्वी झाले होते भांडण

पोलिसांनी दिलेल्या माहितीनुसार, माथा येथे माधव पांडुरंग पोले (१९) याचा त्याचा मित्र दिनेश ऊर्फ दगडू मोळंके याचे वडील भानुदास मोळंके यांच्या सोबत दोन दिवसांपूर्वी भांडण झाले होते. या वेळी माधव याने भानुदास मोळंके यांना शिवीगाळ केली होती. त्याचा राग दिनेशच्या मनात होता. 

येथे क्लिक करा - चोरट्यांनी अख्या गावाला टाकले संकटात

चाकूने छातीवर वार 

बुधवारी रात्री अकरा वाजण्याच्या सुमारास दिनेश याने माधव पोले याच्या घरी जाऊन त्यास बाहेर बोलावले. त्यानंतर घराजवळच असलेल्या इतर तिघांनी माधव पोले यास पकडले. यावेळी दिनेश मोळंके याने चाकूने त्याच्या छातीवर वार केले. यातच माधव पोले याचा मृत्यू झाला. 

गुन्हा दाखल करण्याची प्रक्रिया सुरु 

या घटनेची माहिती मिळाल्यानंतर औंढा नागनाथ पोलिस ठाण्याचे निरीक्षक वैजनाथ मुंडे, सहायक पोलिस निरीक्षक शंकर वाघमोडे, जमादार दिनकर तोंडे, अफसर पठाण, इक्बाल यांच्या पथकाने घटनास्थळी भेट दिली. या प्रकरणात पोलिसांनी दिनेश मोळंके यास ताब्यात घेतले असून औंढा नागनाथ पोलिस ठाण्यात गुन्हा दाखल करण्याची प्रक्रिया सुरू असल्याचे पोलिसांनी सांगितले.