Latest Marathwada News: ट्रक दुचाकीच्या धडकेत दुचाकीस्वार महिला जागीच ठार झाली. ही घटना छत्रपती संभाजीनगर-जळगाव राष्ट्रीय महामार्गावरील मंगरूळ फाट्यालगत बुधवारी (ता.२) दुपारी पाऊणच्या सुमारास घडली. उषा गणेश धुमाळ (वय ३४, रा. माणिकनगर, ता. सिल्लोड) असे मृत महिलेचे नाव आहे.

पालोद येथून सिल्लोडकडे येत असलेल्या दुचाकीला (क्रमांक एमएच.20.सीई.9372) अजिंठ्याकडून जालना येथे जाणाऱ्या ट्रकने (क्रमांक जीजे 31 टी 2470) जोराची धडक दिली. यावेळी दुचाकीवरील उषा धुमाळ खाली पडल्या आणि ट्रकच्या चाकाखाली सापडून त्यांचा जागीच मृत्यू झाला.

सिल्लोड उपजिल्हा रुग्णालयात शवविच्छेदन करून मृतदेह नातेवाईकांच्या ताब्यात देण्यात आला. याप्रकरणी सिल्लोड ग्रामीण पोलिस ठाण्यात आकस्मिक मृत्यूची नोंद करण्यात आली. पुढील तपास पोलिस हवालदार सचिन काळे करित आहेत. मृत महिलेच्या पश्चात पती, सासू, एक मुलगा, दोन मुली असा परिवार आहे.