औसा(जि. लातूर ) ः लातूरहून हरियानातील हिस्सार येथे देवदर्शनासाठी निघालेल्या भाविकांच्या मिनीबसला झालेल्या अपघातात औसा तालुक्‍यातील सहा जणांचा मृत्यू झाला आहे, तर एक सहा वर्षांचा मुलगा जखमी झाला आहे. या अपघातात एकूण तेरा जणांना आपले प्राण गमवावे लागले आहेत, तर नऊजण गंभीर जखमी झाले आहेत.

ही घटना शनिवारी पहाटे तीन वाजण्याच्या सुमारास घडली असून, बसपुढे अचानक जनावर आल्यामुळे चालकाचे वाहनावरील नियंत्रण सुटून मिनीबस झाडावर आदळल्याने हा अपघात घडला. मृतांमध्ये औसा तालुक्‍यातील सहा जणांचा मृत्यू झाला आहे. तर एकजण गंभीर जखमी आहे. 

पहाटे काळाचा घाला
लातूर येथून हरियाना येथील हिस्सार येथे देवदर्शनाला निघालेल्या मिनीबस (एमएच-23, एएस-7176) ला राजस्थान येथील किशनगढ ते हनुमानगढ या मार्गावर कालाभाटाजवळ पहाटे तीनच्या सुमारास हा अपघात झाला. या अपघातात तेरा जणांचा मृत्यू झाला. त्यात औसा तालुक्‍यातील भगवान बेळंबे (वय 50, याकतपूर), मयूरी बेळंबे (वय 18, याकतपूर), सिद्धी गोवर्धन सांगवे (वय नऊ, लामजना), सुमित्रा सांगवे (35, लामजना), सुप्रिया पवार (16, किल्लारी), अरुणा तौर (55, किल्लारी) यांचा मृत्यू झाला आहे, तर आदर्श सांगवे (सहा) हा बालक जखमी झाला आहे.

हेही वाचा - पवार कुटुंबात कोण काय करतंय?

जखमींना जवळच्या रुग्णालयात दाखल करण्यात आले असल्याचे प्रशासनाकडून सांगण्यात आले आहे. हा अपघात झाल्याचे समजताच औशाचे आमदार अभिमन्यू पवार यांनी राजस्थानमधील भाजप कार्यकर्त्यांना तातडीने फोनवर माहिती देऊन जखमींना रुग्णालयात पाठविण्याची व्यवस्था केली. त्याचबरोबर राजस्थान येथील मुख्यमंत्री कार्यालय आणि आरोग्यमंत्र्यांशी संपर्क साधून जखमींना तातडीने मदत मिळण्याची व्यवस्था केली.