राजूर (जि.जालना) -  संकष्ट चतुर्थी निमित्त राजूर (ता.भोकरदन) येथील गणपती संस्थानात लाखो भाविक दर्शनासाठी येतात. संपूर्ण जगात वेगाने पसरणाऱ्या कोरोना विषाणुंच्या पार्श्‍वभुमीवर त्यामुळे जिल्हा प्रशासनाने संस्थानाला दक्ष राहण्याचे आदेश दिले आहेत. संकष्ट चतुर्थी निमित्त गुरूवारी (ता.१२) परिसरात विशेष वैद्यकीय पथक तैनात करण्यात येणार आहे. 

राजूर येथील गणपती मंदीर परिसर संकष्ट चतुर्थी निमित्त लाखो भाविकांनी गजबजून जातो. जगभरात कोरोना विषाणुंचे संकट उदभवले आहे. या पार्श्‍वभुमीवर कोरोना विषाणु संसर्ग प्रतिबंधक उपाययोजनेच्या सूचना देण्यात आल्या आहेत. आरोग्य विभागाच्या मदतीने मंदिर परिसरात कोरोना विषाणू संसर्ग बाबत माहिती देण्यासाठी स्वतंत्र नियंत्रण कक्ष मदत केंद्राची स्थापना करण्यासह ते चोवीस तास सुरू ठेवण्याच्या सूचना देण्यात आल्या आहेत.

हेही वाचा : शाळांमध्ये करणार ‘कोरोना’बाबत जागृती

मंदिर परिसरात स्वतंत्र वैद्यकीय पथके तयार करण्याबाबत कळविले आहे. संशयित रुग्णांसाठी स्वतंत्र रूग्णवाहिकेची व्यवस्था तसेच आवश्यक औषधी साठा उपलब्ध करून देण्यासाठी ही कळविण्यात आले आहे. शिवाय पोस्टर, स्टिकर, फलक यातून जनजागृतीही केली जाणार आहे. स्वतंत्र नोडल अधिकारी ही नियुक्त करण्याच्या सूचना देण्यात आल्या आहेत. 

हेही वाचा : भोकरदनला उपजिल्हा रुग्णालयाची आस 

जगभरात कोरोना विषाणुंचे संकट पाहता गणपती संस्थानात भाविकांनी दर्शन घेताना जास्त गर्दी करू नये. खोकताना तसेच शिंकताना तोंडावर रुमाल धरावा, टिश्‍शूपेपरचा वापर करावा, संशयित रुग्ण आढळल्यास मदत केंद्राला कळवावे, असे तहसीलदार तथा संस्थानचे अध्यक्ष संतोष गोरड यांनी कळविले आहे.