लोहारा(जि.उस्मानाबाद) : शहरातील नेताजी सुभाषचंद्र बोस महाविद्यालयातील विद्यार्थ्यांच्या दोन गटात गुरूवारी (ता.२५) सिनेस्टाईल हाणामारी झाली. यात दोघे किरकोळ जखमी झाले. दरम्यान पोलिसांनी वेळीच हस्तक्षेप करून विद्यार्थ्यांचे समुपदेशन करून सोडून दिले. परंतु मागील काही वर्षांपासून विद्यार्थ्यांमध्ये हाणामारीच्या घटना घडत असल्याने पालकांत चिंतेचे वातावरण आहे. येथील नेताजी सुभाषचंद्र बोस महाविद्यालयात शहरासह परिसरातील विद्यार्थी शिक्षण घेतात. बुधवारी (ता.२४) करजखेडा (ता.उस्मानाबद) व बेंडकाळ येथील विद्यार्थ्यांमध्ये महाविद्यालयीन वेळेत किरकोळ कारणावरून शाब्दीक बाचाबाची झाली. हे प्रकरण निवळले असताना गुरूवारी (ता.२५) सकाळी नऊच्या सुमारास करजखेडा येथील विद्यार्थ्यांनी गावातील काही टवाळखोर युवकांना बोलावून महाविद्यालयातील विद्यार्थ्यांबरोबर कुरापत काढली.

त्यामुळे विद्यार्थ्यांच्या दोन गटांत सिनेस्टाईल हाणामारी सुरू झाली. प्राध्यापकांनी या घटनेची माहिती पोलिसांना देताच पोलिस घटनास्थळी येऊन हस्तक्षेप करीत विद्यार्थ्यांना ताब्यात घेतले. झालेल्या हाणामारीत दोघे किरकोळ जखमी झाले. दरम्यान,  पोलिसांनी दोन्ही गटातील विद्यार्थ्यांचे समुपदेशन करून पुन्हा भांडणे करणार नसल्याचे कबूल करून घेतले. शहरात दर्जेदार शिक्षण मिळत असल्याने तालुक्याबाहेरील विद्यार्थी मोठ्या संख्येने महाविद्यालयात प्रवेश घेतात. यात विद्यार्थीनींची संख्या अधिक आहे. त्यामुळे काही टवाळखोर विद्यार्थ्यांकडून मुलींची छेड काढली जाते.

Aurangabad Corona Updates: औरंगाबादकरांनो काळजी घ्या! कोरोनाबाधितांची संख्या वाढतेय

परगावाहून ये-जा करणाऱ्या विद्यार्थीनींना याचा अधिक त्रास सहन करावा लागत आहे. महाविद्यालय सुटल्यानंतर शहरातील बसस्थानकामध्ये विद्यार्थीनींची मोठी गर्दी असते. काही टवाळखोर विद्यार्थी बसस्थानक परिसरात वाढदिवस साजरा करणे, गोंधळ घालणे असे प्रकार करून विद्यार्थीनींची छेड काढतात. या प्रकारामुळे विद्यार्थीनी त्रस्त झाल्या आहेत. छेड काढल्याचे सांगितल्यावर शिक्षण बंद होईल. या भीतीपोटी मुली कोणतीच तक्रार न करता निमुटपणे त्रास सहन करीत आहेत. छेडछाडीवरून अनेक वेळा विद्यार्थ्यामध्ये हाणामाऱ्याच्या घटना घडत आहेत. पोलिसांनी वेळीच टवाळखोर, रोडरोमिओच्या मुसक्या आवळण्याची गरज आहे.

मराठवाड्याच्या ताज्या बातम्या वाचण्यासाठी येथे क्लिक करा

संपादन - गणेश पिटेकर