जालना: केंद्रीय राज्यमंत्री रावसावहेब दानवे (raosaheb danve) यांच्या जाफराबाद येथील संपर्क कार्यालयाची पूर्व परवानगी न घेतला झाडाझडीत घेतल्या प्रकरणी निलंबित केलेल्या पाच पोलिसांचे निलंबन मागे घेण्यात आले आहे. ही माहिती अप्पर पोलिस अधीक्षक विक्रांत देशमुख यांनी शनिवारी (ता.१९) दिली. जाफराबाद येथे एका पत्रकारावर वाळू माफियांनी हल्ला केला होता. त्यानंतर जाफराबाद पोलिसांना या हल्ल्यातील काही संशयित एका राजकीय नेत्याच्या संपर्क कार्यालयात असल्याची माहिती मिळाली होती.

मात्र, या संदर्भात वरिष्ठांना माहिती न देता, तसेच पूर्व परवानगी न घेता जाफराबाद पोलिसांनी काही दिवसांपूर्वी जाफराबाद येथील केंद्रीय राज्यमंत्री रावसाहेब दानवे यांच्या संपर्क कार्यालयाची झाडाझडती घेतली. या प्रकरणी पोलिस अधीक्षक विनायक देशमुख यांच्याकडे केंद्रीय राज्यमंत्री रावसाहेब दानवे यांनी तक्रार केल्यानंतर पोलिस अधीक्षक श्री. देशमुख यांनी चौकशीनंतर पोलिस उपनिरीक्षक नितीन काकरवाल, पोलिस उपनिरीक्षक युवराज पोठरे, पोलिस कर्मचारी मंगलसिंग सोळंके, सचिन तिडके, शाबान तडवी यांना ता.१४ जुन रोजी निलंबित केले.

मात्र, यात पोलिसांची काहीच चुक नसताना निलंबानाची कारवाई करण्यात आली असून ही निलंबानाची कारवाई मागे घ्यावी, अशी मागणी शिवसेनेचे नेते माजी राज्यमंत्री अर्जुन खोतकर यांनी गृहमंत्री दिलीप वळसे पाटील यांची तीन दिवसांपूर्वी मुंबई येथे भेट घेवून केली होती. यावेळी माजी आमदार चंद्रकांत दानवे ही त्यांच्यासोबत होते. त्यानंतर केंद्रीय राज्यमंत्री रावसाहेब दानवे यांच्या संपर्क कार्यालयाची झाडाझडती घेतल्या प्रकरणी निलंबित केलेल्या पोलिस उपनिरीक्षक नितीन काकरवाल, पोलिस उपनिरीक्षक युवराज पोठरे, पोलिस कर्मचारी मंगलसिंग सोळंके, सचिन तिडके, शाबान तडवी यांचे निलंबन शनिवारी (ता.१९) मागे घेण्यात आल्याचे अपर पोलिस अधीक्षक विक्रांत देशमुख यांनी सांगितले आहे.