नळदुर्ग (जि. उस्मानाबाद) : शहरात चोरट्यांनी धुमाकूळ घातला असून, एकाच रात्रीत चार सराफांची व बांगडी विक्रेत्याचे असे पाच दुकाने फोडून चोरट्यांनी पोलिसांसमोर पुन्हा आव्हान उभे केले. गुरूवारी (ता. २) पहाटेच्या सुमारास मुख्य बाजारपेठेतील चार सराफा व एक बांगड्याचे दुकान चोरट्यांनी फोडले. 

सकाळी उशिरापर्यत पोलिसांकडून पंचनामा करण्याचे काम सुरू होते. शेजारील सोन्याच्या दुकानातील सीसीटीव्ही कॅमेऱ्यात तीन चोरटे दिसत असले तरी त्यांनी तोंडावर कपडा झाकलेला होता.

शहरात गेल्या अनेक महिन्यांपासून चोरीचे सत्र सुरूच आहे. शहरातील भवानी चौक ते शास्त्री चौक दरम्यानची पाच दुकाने चोरट्यांनी गुरुवारी पहाटेच्या सुमारास फोडली. नागू पोतदार व शाम बागल यांचे लक्ष्मी ज्वेलर्स, सतीश मोटे यांचे जय भवानी ज्वेलर्स, वैभव शिंदे यांचे न्यू मंगल ज्वेलर्स, किरण ओवे यांचे वैष्णवी ज्वेलर्स या चार सराफांची दुकाने व ऋतुजा बँगल्स हे बांगडीचे दुकान चोरट्यांनी फोडले. 

वाचा - बिबट्याच्या तावडीतून असे बचावले दांपत्य

या घटनेमुळे शहर व परिसरात खळबळ उडाली असून, नागरिकांत भितीचे वातावरण पसरले आहे. चार सराफांची दुकाने भर बाजारपेठेत फोडली. पोलिस पंचनामा झाल्यानंतरच चोरीचा निश्चित आकडा समोर येणार आहे. सहायक पोलिस निरीक्षक मनोहर वानखेडे हे पोलिस कर्मचाऱ्यांसह सकाळी आठ वाजता घटनास्थळी दाखल झाले.

नळदुर्ग शहरात काही दिवसांपूर्वी झालेल्या चोऱ्यांचा अद्याप तपास लागलेला नसताना चोरांनी सराफांची दुकाने फोडून पोलिसांना आव्हान दिले आहे. श्रेया ज्वेलर्स या दुकानातील सीसीटीव्ही कॅमेऱ्यामध्ये चोरटे चारचाकी गाडी घेऊन आल्याचे दिसत आहे. पहाटेच्या सुमारास यावेळी पाऊस येत होता. चोरट्यांचा शोध घेण्यासाठी श्वानपथक बोलावल्याची माहिती सहायक पोलिस निरीक्षक वानखेडे यांनी दिली.

हे वाचलंत का?- Video : दोन किलो मिठाई खाणारा उंदीर... पहा पराक्रम