सोनपेठ (जि.परभणी) : डिघोळ तांडा (ता.सोनपेठ) (Sonpeth) येथील एका अल्पवयीन मुलीवर तिघांनी सामुहिक अत्याचार केल्याची घटना रविवारी (ता.१२) घडली होती. या घटनेनंतर पीडितेने विषारी औषध पिले होते. त्यात सोमवारी (ता.२०) लातूर येथील रुग्णालयात उपचारादरम्यान (Crime Against Girl) तिचा मृत्यु झाला. या प्रकरणी सोनपेठ पोलिसांनी दोघांना ताब्यात घेतले असून एक आरोपी फरार आहे. सोनपेठ तालुक्यातील डिघोळ तांडा (Parbhani) येथे राहणाऱ्या अल्पवयीन मुलीस याच गावातील तिघांनी रविवारी (ता.१२) दुपारी एक ते पाच वाजेच्या सुमारास फोन करुन पडक्या शाळेत बोलवुन घेतले होते. त्या ठिकाणी तिघांनी तिच्यावर अत्याचार केला.

या घटनेमुळे हादरलेल्या पीडितेने मंगळवारी (ता.१४) विषारी औषध प्राशन केले. उपचारासाठी तिला अंबाजोगाई (जि.बीड) येथील शासकीय रुग्णालयात दाखल केले. पंरतू, तिची प्रकृती गंभीर झाल्याने तिला पुढील उपचारासाठी लातुर येथे हलविण्यात आले. परंतू तिचा सोमवारी (ता.२०) मृत्यु झाला. या प्रकरणी पीडितेच्या नातेवाईकांनी सोनपेठ पोलीसात तक्रार दाखल केली. त्यावरुन सोनपेठ पोलीसांनी तीन आरोपी विरुद्ध बाल लैंगिक अत्याचार प्रतिबंधक कायद्याखाली गुन्हा नोंद केला आहे. यातील दोन आरोपींना पोलिसांनी ताब्यात घेतले असून एक आरोपी फरार आहे अशी माहिती पोलिस निरीक्षक श्रीनिवास भिकाने यांनी दिली.