चाकूर (जि.लातूर) : दोन जुळ्या बहिणी लहानपणापासून विभक्त राहिल्या. दहावीची परीक्षा दोघींनी वेगवेगळ्या शाळेतून दिली असली तरी दोघींनी दहावीच्या (SSC Result) गुणात जुळवून घेत ८७.६० टक्के गुण मिळविण्याची किमया साधली आहे. अंकिता व निकिता या दोंघी जुळ्या बहिणी, दोघी दिसण्यामध्ये सारख्या यामुळे घरातील सर्वजण गोंधळून जायचे. यामुळे आईने लहानपणापासून दोघींना वेगवेगळे ठेवले. कुरळा (ता.कंधार) येथील भरत श्रीरामे हे चाकूर येथे खासगी नोकरी करतात. त्यांना जुळ्या मुली आहेत. (Twin Sisters Get Same Marks In SSC Board Examination In Latur Division)

यापैकी निकिता ही आई जवळ राहून येथील भाई किशनराव देशमुख विद्यालयात शिक्षण घेत होती, तर अंकिता ही गावाकडे आजी-आजोबा जवळ राहून कुरळा गावातील श्री शिवाजी विद्यालयात दहावीला होती. लहानपणापासून दोघी स्वतंत्र राहत होत्या. कधीतरी त्यांच्या भेटी होत असत. दोघी एकमेकांच्या संपर्कात राहून अभ्यास करीत होत्या. दहावीचा निकाल जाहीर झाला तेव्हा दोघींना समान ४३८ गुण मिळाले आहेत. जुळ्या बहिणींनी पंधरा वर्षे विभक्त राहिल्यानंतर दहावीच्या परीक्षेतील गुणातही जुळवून घेतल्याबद्दल दोघींचे भाई किशनराव देशमुख शाळेच्या मुख्याध्यापिक सुनिता कोयले, सहशिक्षिका वर्षा सांगवीकर यांनी अभिनंदन केले. (Latur News)

दोघींना समान गुण पडल्यामुळे आश्चर्यांचा धक्का बसला. परीक्षेच्या काळात आम्ही एकमेकींच्या संपर्कात होतो. अभ्यास स्वतंत्र केला. यापुढेही आम्ही दोघी लातूर येथे एकत्र अकरावी कला शाखेला प्रवेश घेणार आहोत.

- निकिता, अंकिता भरत श्रीरामे