जालना : वाळू वाहतुकीचा टिप्पर पकडल्यानंतर तपासात मदत करत संशयिताला गुन्ह्यात जामीन दिल्यानंतर वाळूचा टिप्पर सुरू ठेवण्यासाठी पंधरा हजारांची लाच खासगी व्यक्तीमार्फत घेतल्या प्रकरणी सेवली (ता.जालना) पोलिस ठाण्याच्या दोन पोलिस कर्मचाऱ्यांना जालना लाच लुचपत प्रतिबंधक विभागाने ताब्यात घेतले.

सेवली पोलिसांनी वाळू वाहतूक करणारा एक टिप्पर पकडण्यात आला होता. या प्रकरणाचा तपास सेवली पोलिस ठाण्याचे पोलिस हवालदार गजानन नागरे यांच्याकडे होता. या प्रकरणातील संशयिताला जामीन दिल्यानंतर वाळूचा टिप्पर पकडणाऱ्या सेवली पोलिस ठाण्यातील पोलिस कर्मचारी प्रल्हाद भानुसे याने तक्रारदार यांच्या भावाकडे तपासात मदत करण्यासह वाळूचा टिप्पर सुरू ठेवण्यासाठी तीस हजारांच्या लाचेची मागणी केली.

तडजोडीअंती पंधरा हजार रूपये देण्याचे ठरले. मात्र, या प्रकरणी तक्रारदार यांनी जालना लाचलुचपत प्रतिबंधक विभागाकडे तक्रार केली. या तक्रारीची पडताळणी केल्यानंतर बुधवारी (ता.३१) बेलोरा चौफुली (ता.मंठा, जि. जालना) येथे खासगी इसम प्रदीप ऊर्फ वामन खंदारे याला पंधरा हजारांची लाच घेताना रंगेहात अटक करण्यात आली.

या प्रकरणी सेवली पोलिस ठाण्यात पोलिस हवालदार गजानन नागरे, पोलिस कर्मचारी प्रल्हाद भानुसे आणि खासगी इसम प्रदीप ऊर्फ वामन खंदारे या तिघांविरोधात गुन्हा दाखल करण्यात आला आहे. ही कारवाई जालना लाचलुचपत प्रतिबंधक विभागाचे पोलिस निरीक्षक शंकर मुटेकर, सहायक फौजदार ज्ञानदेव जुंबड, पोलिस अंमलदार गजानन कांबळे यांच्या पथकाने केली.