शिरडशहापूर (जि. हिंगोली) ः औंढा नागनाथ तालुक्‍यातील शिरडशहापूर येथून जवळच असलेल्‍या सारंगवाडी येथे सुरू असलेल्‍या सारंगस्‍वामी महाराज यात्रेत शुक्रवारी (ता. १७) भाजी महाप्रसादाचा हजारो भाविकांनी लाभ घेतला. या वेळी दीडशे क्‍विंटल भाजीचा प्रसाद तयार करण्यात आला होता. राज्याभरासह कर्नाटक राज्यातील वीरशैव समाजबांधव भाजीचा प्रसाद घेण्यासाठी दाखल झाले होते.

औंढा नागनाथ तालुक्यातील शिरड शहापूरपासून जवळच असलेल्‍या माळरानावर सारंगवाडी येथे विरशैव समाजबांधवांचे आराध्य दैवत असलेल्या सारंगस्‍वामी महाराज यांची यात्रा सुरू आहे. या यात्रेला अनेक वर्षांची परंपरा आहे. मकरसंक्रांतीनंतर तिसऱ्या दिवशी सारंगस्‍वामी महाराज यात्रेनिमित्त भाजीचा प्रसाद वाटप करण्यात येतो.

हेही वाचा... VIDEO-मूर्तिकलाच बनली उपजीविकेचे साधन
विविध भाज्यांचा बनविला महाप्रसाद

गुरुवारी (ता. १६) शिरडशहापूरसह परिसरातील भाविकांनी मेथी, पालक, टोमॅटो, काकडी, कदू, चवळी, आवरा, कांद्याची पात, कोबी, हरभरा, करडई, गाजर, सिमला मिरची, लाल मिरची, हिरवी मिरची, शेपू, वांगे, बटाटे, वाटाणा आदी प्रकाराच्या भाज्या आणून दिल्या. शुक्रवारी (ता. १७) सकाळी साडेसात वाजता एका मोठ्या कढईत मंदिर परिसरात या सर्व भाज्या एकत्र करून शिजविण्यात आल्‍या. त्‍यानंतर साडेनऊ वाजता जिल्‍हा परिषद सदस्य श्रीशैल्य स्‍वामी, उज्‍ज्वलाताई तांबाळे यांच्यासह मान्यवरांच्या उपस्‍थितीत भाजी महाप्रसादाचे वाटप सुरू करण्यात आले. यात हजारो भाविकांनी रांगा लावून भाजी प्रसादाचा लाभ घेतला. उज्‍ज्वलाताई तांबाळे यांच्यातर्फे भाविकांना पोळ्यांचे वाटप करण्यात आले.

परराज्यांतून भाविक दाखल

या कार्यक्रमासाठी राज्‍याभरासह कनार्टक आदी राज्यांतून भाविक दाखल झाले होते. येथे सकाळपासूनच भाविक दाखल होत असल्याने परिसरात वर्दळ वाढली होती. यात्रा परिसरात हजारो वाहने लावण्यात आली होती. दरम्यान, पोलिस व महसूल प्रशासनातर्फे चोख बंदोबस्‍त ठेवण्यात आला होता. या कार्यक्रमासाठी वीरशैव समाजबांधवांसह शिरड शहापूर, सारंगवाडी, गवलेवाडी येथील गावकऱ्यांनी पुढाकार घेतला.

हेही वाचा...Video - हजारो भाविकांनी घेतला भाजी-भाकरीचा प्रसाद ​

यात्रेनिमित्त विविध साहित्य विक्रीची दुकाने

सारंगवाडी येथे वीरशैव समाजबांधवांचे आराध्य दैवत असलेल्या सारंगस्‍वामी महाराज यांची यात्रा सुरू आहे. नवीन वर्षातील पहिल्या सणानंतर तिसऱ्याच दिवशी ही यात्रा येते. यात विविध व्यापारी मोठ्या संख्येने साहित्य विक्रीसाठी घेऊन येतात. गुरुवारपासूनच व्यापारी दाखल होत होते. मंदिर परिसरात विभुती, पोथ्या, पुजेचे साहित्य, सौंदर्य प्रसाधने, भांड्यांची दुकाने, हॉटेल आदी दुकाने थाटण्यात आली होती.