हयातनगर ः वसमत तालुक्‍यातील कागबन गावाने गावात स्‍वच्‍छता अभियान राबविण्याचा निर्णय घेतला असून दर रविवारी गावात स्‍वच्‍छता अभियान राबविले जात आहे. यात शालेय विद्यार्थी देखील सहभागी होत असून गाव चकाचक केले जात आहे. 

वसमत तालुक्‍यातील कागबन गावची लोकसंख्या अकराशे आहे. गावात बहुतांश शेतकरी व शेतीवर आधारित काम करणाऱ्या मजुरांची संख्या अधिक आहे. गावात पहिली ते पाचवीपर्यंतची जिल्‍हा परिषद शाळा आहे. त्‍यानंतर विद्यार्थ्यांना येथून जवळच असलेल्या हयातनगर येथील शाळेत पुढील शिक्षण घ्यावे लागते. यासह गावात महिला बचतगटाची स्‍थापना झाली असून नियमित त्‍याच्या बैठका घेवून बचत केली जात आहे. तसेच गटाने बँकेकडे कर्जासाठी मागणी केली असून गटातील महिला गटातील सदस्यांना देखील कर्जाचे वाटप करतात. यामुळे काही गट सक्षम देखील झालेले आहेत. 

यांनी घेतला पुढाकार
गावात स्‍वच्‍छता अभियान राबविण्याचा निर्णय ग्रामस्‍थांनी घेतला. त्‍यासाठी सरपंच सागरबाई कोल्हे, देवानंद ढवळे, सदाशिव महाजन, आशालता ढवळे,बबन कोल्हे,सुर्यभान ढवळे, अंकुश महाजन, रामभाऊ ढवळे,संजय ढवळे,निलावंती सवंडकर,सारिका महाजन, रेणुका ढेंबरे , तुळशीराम जाधव,प्रविण महाजन, शंकर ढवळे, साईनाथ ढवळे,गोंविद ढवळे,अमोल ढवळे,लक्ष्मण ढवळे,मुंजाजी कल्याणकर, निवृती सवंडकर यांनी पुढाकार घेवून घरोघरी जावून स्‍वच्‍छेतेचे महत्‍व पटवून दिले. त्‍यानंतर आठवड्यातून एक दिवस श्रमदान करण्याचा निर्णय झाला. यासाठी रविवारचा दिवस निवडण्यात आला. 

हेही वाचा -. ..अन्‌ ओसाड भिंती झाल्या बोलक्‍या

गावातील नाल्यांची देखील साफसफाई
बाहेर गावात शिक्षणासाठी गेलेले विद्यार्थी सुट्टीच्या दिवसी या अभियानात सहभागी होत आहेत. शाळेचा परिसर, मंदिराचा परिसर, गावातील रस्‍ते साफ करून जमा झालेल्या कचऱ्याची विल्‍हेवाट लावली जात आहे. गावातील नाल्यांची देखील साफसफाई केली जात आहे. गांजरगवत निर्मुलन केले जात आहे. या उपक्रमामुळे गावात स्‍वच्‍छता झाली आहे. आरोग्याचा प्रश्न सुटण्यास देखील मदत झाली आहे. 

हेही वाचा - ‘ही’ जिल्हा परिषदेची शाळा तालुक्यात अव्वल

कचऱ्याचे ढिगारे दिसेनासे झाले
गावात वाढलेल्या डासांचा प्रादुर्भाव कमी झाला आहे. गावातून बाहेरगावी जाणारे विद्यार्थी सुट्टीच्या दिवशी शाळेच्या परिसरात स्‍वच्‍छता करून येथे केलेल्या वृक्षांना पाणी देत आहेत. पर्यावरणाचा समतोल राखण्यासाठी वृक्षांचे संगोपन केले जात आहे. गावात स्‍वच्‍छतेची चळवळ सुरू झाल्याने सार्वजनिक ठिकाणी आता कचऱ्याचे ढिगारे दिसेनासे झाले आहेत. 

प्रत्‍येक रविवारी गावात स्‍वच्‍छता
कागबन गावात स्वच्छतेला प्राधान्य देण्यासाठी गावातील सर्वांनी संघटित होवून स्‍वच्‍छता अभियान सुरू केले आहे. प्रत्‍येक रविवारी गावात स्‍वच्‍छता केली जात आहे. यात शालेय विद्यार्थी देखील सहभागी होत असल्याने गाव चकाचक झाले आहे. -निवृती सवंडकर, ग्रामस्‍थ, स्‍वच्‍छता मोहीम प्रमुख.