हिंगोली : जिल्ह्यात एकुण ४९५ ग्रामपंचायतीसाठी मतदान होत असुन यापैकी ७३ ग्रामपंचायत बिनविरोध निवडल्याने आता ४२२ ग्रामपंचायतचे कारभारी निवडीसाठी शुक्रवारी (ता.१५)  सकाळी साडेसात वाजता मतदानास सुरुवात झाली.

जिल्ह्यात एक हजार २७२ बुथवर सहा लाख ६० हजार ७११ मतदार मतदानाचा हक्क बजावणार आहेत. सकाळी मतदान प्रक्रिया सुरू झाली आहे. मतदान केंद्रावर हळूहळू मतदारांची गर्दी होत आहे. गावात जास्तीत जास्त मतदान करून घेण्यासाठी उमेदवारांसह त्यांचे समर्थक मतदारांना मतदान करण्यास आवाहन करत गल्लोगल्ली मतदानाला चला आवरा लवकर मतदान करुन नंतर घरची कामे करा असे सांगत आहेत. 

हेही वाचा - नांदेड जिल्ह्यातील मतदार कोणाला देणार तिळगुळ ; ९०७ ग्रामपंचायतीसाठी आज मतदान

कामानिमित्त बाहेरगावी गेलेले गावकरी देखील मतदानासाठी गावात दाखल झाल्याने गावे गजबजली आहेत. मतदारांना वाहनांतुन मतदान केंद्रापर्यंत आणले जात आहे. मतदान केंद्रावर तगडा पोलिस बंदोबस्त ठेवण्यात आला आहे.  अनेक गावात दुरंगी, तिरंगी लढत होत असल्याने आपल्या प्रभागात जास्तीत जास्त मतदान करून घेण्याकडे सर्वांचा कल आहे. मतदान केंद्राबाहेर टेन्ट टाकून उमेदवार व त्यांचे समर्थक बसले आहेत. मतदानासाठी आलेल्या मतदारांना पोल चिट वरुन त्यांचा बुथनंबर यादी नंबर लिहून देत आहेत. 

हे देखील वाचलेच पाहिजे - हिंगोली जिल्ह्यातील सहकारी संस्थांच्या निवडणुका घेण्याचे आदेश

शेतात कामासाठी जाणारे शेतकरी, मजूर यांनी सकाळीच मतदान करण्यास पसंती दिल्याने अनेकांनी मतदान करून आपल्या कामाच्या ठिकाणी गेले आहेत. जिल्ह्यात ग्रामीण भागात शुक्रवारी असलेले आठवडी बाजार मतदानामुळे बंद ठेवण्याचे आदेश जिल्हाधिकारी रुचेश जयवंशी यांनी दिल्याने आज आठवडी बाजार बंद होते. जिल्ह्यात शांततेत मतदान प्रक्रिया सुरू झाली आहे.

मराठवाड्यातील इतरही बातम्या वाचण्यासाठी येथे क्लिक करा