आष्टी - सरकारने कर आकारण्यासाठी एकही गोष्ट सोडली नाही. गेल्या दहा वर्षांत या सरकारने प्रचंड लूट केली आहे. आज तुम्हाला केंद्राचे सहा हजार आणि राज्याचे सहा हजार एवढेच पैसे दिसतात. परंतु वर्षभरात जीएसटीच्या नावाखाली तुमच्या खिशातून लाखो रुपये काढून घेतले आहेत.

सोयाबीनचे दर पडले असून खतांच्या किमती प्रचंड वाढल्याचा आरोप राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांनी केला. दिल्लीत आमचे सरकार आल्यानंतर ५० टक्क्यांपर्यंतच्या आरक्षणाचा अडथळा कायद्यान्वये दूर करू, असे आश्वासनही त्यांनी दिले.

लोकसभेच्या बीड मतदारसंघातील पक्षाचे उमेदवार बजरंग सोनवणे यांच्या प्रचारार्थ सोमवारी येथे झालेल्या सभेत ते बोलत होते. खासदार डॉ. अमोल कोल्हे, आमदार संदीप क्षीरसागर, उषा दराडे, सुशीला मोराळे आदी उपस्थित होते. जयंत पाटील म्हणाले, ‘शेतकऱ्यांच्या मालावर निर्यातबंदी घालून शेतकऱ्याला खड्ड्यात घालायचे पाप सरकारने केले आहे.

ज्या संविधानाने यांना दिल्लीत सरकार स्थापनेची संधी दिली त्याच संविधानाच्या डोक्यावर पाय ठेवायचे काम सरकारने केले. ४०० पेक्षा जास्त खासदार निवडून आणू आणि या देशाचे संविधान बदलू, असे पाप यांच्या डोक्यात आहे. सोन्याचे भाव वाढले, डॉलरची किंमत वाढली, महागाई वाढली आहे. परंतु या दहा वर्षांत सरकारच्या धोरणांमुळे मूठभर लोकच श्रीमंत झाले’.

आधी रोजगाराचे बोला : अमोल कोल्हे

जातीच्या नावाने विष पेरणाऱ्या लोकांना एकच सांगा, पोटाची आग नियंत्रणात आणणाऱ्या भाकरीला जात नसते. त्यापेक्षा तुम्ही आधी रोजगाराचे बोला, असे आवाहन खासदार अमोल कोल्हे यांनी केले. ‘कांदा निर्यातबंदीमुळे शेतकऱ्यांचे हजारो कोटींचे नुकसान झाले आहे. त्याची भरपाई कोण करणार? फ्यूचर गेमिंग कंपनीने ५०० कोटी रुपयांचे इलेक्टोरल बॉण्ड दिल्यामुळे मोदींनी देशातील युवकांचे भविष्य त्यांना विकले आहे का? असा प्रश्न सर्वसामान्य जनतेच्या मनात आहे’, असा आरोप त्यांनी केला.