ठाणे : ठाणे जिल्ह्याच्या ग्रामीण भागात कोरोनाचा प्रादुर्भाव वाढत असताना सकारात्मक बातमीही समोर आली आहे. जिल्ह्याच्या ग्रामीण भागातील 42 कोरोना रुग्ण बरे होऊन स्वगृही परतले आहेत. ही सर्वांसाठी आनंददायी बाब असून कोरोना रुग्ण बरे होऊन स्वगृही परतत आहेत. त्यामुळे काळजी करू नका, काळजी घ्या असे आवाहन ठाणे जिल्हा परिषदेचे मुख्य कार्यकारी अधिकारी हिरालाल सोनवणे यांनी केले. तसेच कोरोनाचा वाढता प्रादुर्भाव रोखण्यासाठी जे परिसर प्रतिबंधित क्षेत्र म्हणून घोषित करण्यात आलेले आहेत, त्या परिसरात काटेकोरपणे अंमलबजावणी करण्याचे निर्देशही त्यांनी संबंधितांना दिले. 

क्लिक करा : राज्यात केरळ पॅटर्न! आरोग्य मंत्री राजेश टोपे यांची केरळच्या आरोग्यमंत्र्यांशी चर्चा

कोरोनाच्या पार्श्वभूमीवर मंगळवारी सोनवणे यांनी दृकश्राव्य माध्यमातून जिल्ह्यातील सर्व संबंधित यंत्रणांचा आढावा घेतला. या आढावा बैठकीला अतिरिक्त मुख्य कार्यकारी अधिकारी ब. भि. नेमाने, सर्व तालुक्याचे संपर्क अधिकारी, गट विकास अधिकारी, जिल्हा आरोग्य अधिकारी, तालुका आरोग्य अधिकारी आणि इतर विभागाच्या अधिकाऱ्यांनी सहभाग घेतला.

दरम्यान, आतापर्यंत ग्रामीण भागात 185 रुग्ण कोरोना पॉझिटिव्ह आढळून आले असून त्यापैकी 42 रुग्ण बरे झाले आहेत. जिल्ह्यात एकूण 74 प्रतिबंधित क्षेत्र घोषित करण्यात आलेले असून 824 जणांची टीम या ठिकाणी सर्वेक्षण करत आहेत. या टीमने आतापर्यंत 12 लाख 47 हजार 221 जणांचे सर्वेक्षण केल्याची माहिती यावेळी देण्यात आली. 

ठाणे जिल्ह्याच्या ग्रामीण भागात कोरोनाचा वाढता संसर्ग रोखण्यासाठी जिल्हा परिषद अध्यक्ष दीपाली पाटील, मुख्य कार्यकारी अधिकारी हिरालाल सोनवणे, उपाध्यक्ष सुभाष पवार यांच्या मार्गदर्शनाखाली जिल्हा परिषद प्रशासन सर्वोतोपरी प्रयत्न करत आहे.

क्लिक करा : राज्यातील आरटीओ कार्यालये सुरू होणार! फक्त 'या' वाहनांचेच होणार रजिस्ट्रेशन

ग्रामीण भागातील प्रत्येक ग्रामपंचायतस्तरावर कोरोना प्रतिबंधात्मक उपाययोजना करण्यात येत आहेत. कोरोनाचा अटकाव करण्यासाठी प्रतिबंधित क्षेत्रातील परिसरात आरोग्य विभागाअंतर्गत शिक्षण विभाग, महिला व बाल विकास विभाग यांच्या मदतीने जलद सर्वेक्षण करण्याचे काम सुरू आहे. 

कोव्हिड केअर आणि विलगीकरण कक्षाची उभारणी 
कोरोनाचा वाढता प्रादुर्भाव रोखण्यासाठी जिल्हा परिषद, जिल्हा प्रशासनाच्या सहकार्याने जलद पावले उचलत असून आताच्या घडीला तीन विलगीकरण कक्ष आणि दोन कोव्हिड केअर सेंटर निर्माण करण्यात आलेले आहेत. यामध्ये टाटा आमंत्रा (भिवंडी), बीएसयूपी सोनिवली (बदलापूर), जोंधळे कॉलेज (शहापूर) याठिकाणी विलगीकरण कक्ष आहेत. तर बीएसयूपी सोनिवली, जोंधळे कॉलेज याठिकाणी कोव्हिड केअर सेंटर उभारण्यात आलेले आहे, अशी माहिती जिल्हा आरोग्य अधिकारी डॉ. मनीष रेंघे यांनी दिली.