डोंबिवली : भंगार गोळा करणारी महिला तिच्या 6 महिन्याच्या चिमुकल्यासह फुटपाथवर झोपली होती. याचा फायदा घेत शनिवारी रात्री तिच्या मुलाचे अपहरण करण्यात आले. याप्रकरणी महात्मा फुले चौक पोलीस ठाण्यात गुन्हा दाखल होताच पोलिसांनी 12 तासाच्या आत मुलाचा शोध घेऊन उल्हासनगर येथून त्याची सुटका केली. चिमुकला अरबाज त्याच्या आईच्या कुशीत सुखरूप पोहोचला आहे. उल्हासनगर येथील रिक्षाचालकाने या चिमुकल्याचे अपहरण का केले याचा पोलीस तपास करत आहेत.

दिनेश भैय्यालाल सरोज (वय 35) व अंकीतकुमार राजेंद्रकुमार प्रजापती ( वय 25) अशी अटक आरोपींची नावे आहेत. दिनेश हा रिक्षाचालक असून अंकित हा टेलरचे काम करतो. फिर्यादी महिला आयेशा शेख (वय 20) या कल्याण पश्चिमेला व्हॉल मेमोरीयल मेवेडीस्ट चर्च पेथील केडीएमसी बस स्टॉप शेजारी फुटपाथवर राहतात. भंगार गोळा करण्याचे काम त्या करतात. शनिवारी रात्री 1 ते 4 या दरम्यान आयेशा या आपल्या मुलांसह झोपल्या असता त्यांच्या मुलाचे अपहरण झाले होते. याप्रकरणी महात्मा फुले चौक पोलीस ठाण्यात गुन्हा दाखल करण्यात आला होता.

गुन्हयाचे गांभीर्य लक्षात घेत वरिष्ठ पोलीस निरीक्षक शैलेश साळवी यांनी अज्ञात आरोपीचा शोध घेण्यासाठी 3 तपास पथके तयार केले होते. तपास पथकातील पोलीस अधिकारी व अंमलदार यांनी सीसीटीव्ही फुटेज, तांत्रिक माहिती व मिळालेल्या खात्रीशीर माहितीचे आधारे सापळा रचून दिनेश व अंकीतकुमार यांना त्यांच्या राहत्या घरातून ताब्यात घेतले. त्याचवेळी 6 महिन्याचा अपहृत मुलगा अरबाज समीर शेख याची उल्हासनगर येथून आरोपीच्या राहत्या घरातून सुखरूप सुटका केली.

रविवारी दोघांना पोलिसांनी अटक केली असून तपासात दिनेश हा रिक्षा चालवित असताना मुलाचे पालक गाढ झोपेत असल्याची खात्री करून त्या मुलास गुपचुप उचलून नेऊन अंकित च्या मदतीने त्याच्या राहते घरी ठेवले असल्याचे सांगीतले. त्याप्रमाणे तपास सुरू आहे. सदर गुन्हयाचा तपास पोलिस निरीक्षक विजय नाईक हे करीत आहेत. 6 महिन्याचा अरबाज याची 12 तासात सुखरूप सुटका करत त्याच्या आईच्या ताब्यात देण्यात आले आहे. गुन्हासाठी वापरलेली ऑटो रिक्षा, मोबाईल फोन असा मुद्देमाल हस्तगत करण्यात आला आहे.