मुंबई : अभिनेते सुमीत राघवन यांनी फ्रान्समधील घटनेचा व्हिडिओ ट्विट करत ‘आरे बचाव’ कार्यकर्त्यांवर टीका केली आहे. राघवन यांच्या ट्विटवर पर्यावरणवादी संघटनांकडून संताप व्यक्त होत आहे. वातानुकूलित घर आणि गाडीच्या बाहेर कधीही न पडलेल्या अभिनेत्याला निसर्गाशी एकरूप होणे कसे सध्या होणार, पैसे घेऊन मुजरा करणाऱ्या अभिनेत्यांनी पर्यावरणासाठी झगडणाऱ्या आंदोलकांना शिकवू नये,’’ अशी टीका वनशक्ती संस्थेचे संचालक स्टॅलिन डी. यांनी केली.

राघवन यांनी फ्रान्समधील वातावरण बदलाच्या विरोधात रस्त्यावर उतरून आंदोलन करणाऱ्या आंदोलकांचा व्हिडिओ शेअर केला आहे. पोलिस या आंदोलकांना फरफटत रस्त्यावरून बाहेर फेकत असल्याचे दिसत असल्याचा दावा करण्यात आला आहे. ‘आरे कार्यकर्त्यांबरोबर असेच करायला हवे होते आपण. हे फालतू लोक डोक्यावर बसले होते. ते काही कामाचे नाहीत झोलाछाप, अशी टिप्पणी करत सुमीत राघवन यांनी व्हिडिओ ट्विट केला आहे.