मुंबई : राज्यातील सत्तानाट्य आणि शिवसेनेच्या फुटीनंतर आदित्य ठाकरे अॅक्टिव्ह झाले आहेत. ज्या बंडखोरांना पुन्हा शिवसेनेत परतायचं आहे, त्यांच्यासाठी आदित्य ठाकरेंनी एक संदेश दिला आहे. खरी शिवसेना कोणाची? यावरून संघर्ष सुरू असताना उद्धव ठाकरे आणि एकनाथ शिंदे गटात समेट होण्याची शक्यता आहे का? या प्रश्नावर आदित्य ठाकरेंना विचारणा करण्यात आली त्यावर ते बोलत होते. (Aditya Thackeray gave this message to those rebel MLAs who want to return to Shiv Sena)

आदित्य ठाकरे म्हणाले, ज्या बंडखोर आमदारांना पुन्हा शिवसेनेत परतायचं त्यांना मी सांगितलं आहे की, जर तुम्हाला परतायचं असेल तर दरवाजे कायम खुले आहेत. दरम्यान, महाविकास आघाडीचं सरकार खाली खेचणाऱ्या मुख्यंमत्री एकनाथ शिंदे यांच्यासह पक्षातील बंडखोर आमदारांवर टीकास्त्र सोडलं. त्यांची ही कृती बेकायदा आणि घटनाविरोधी असल्याचंही ते म्हणाले.

शिवसेनेतून शिंदे गट बाहेर पडल्यानंतर त्यांनी भाजपसोबत सत्ता स्थापन केली. पण आता मूळ शिवसेना आणि शिंदे गट यांच्यामध्ये पक्ष कोणाचा? यावरु संघर्ष सुरु झाला आहे. यावर सुप्रीम कोर्टात सुनावणी सुरु आहे. तर शिवसेनेच्या धनुष्यबाण या चिन्हासाठी दोघांनी निवडणूक आयोगाकडं धाव घेतली आहे. यावर आयोगानं दोन्ही गटांना कागदपत्रे सादर करण्याचे निर्देश दिले आहेत. पण एकूण परिस्थिती पाहता धनुष्यबाण हे चिन्ह गोठवलं जाण्याची शक्यता घटनातज्ज्ञांकडून वर्तवण्यात येत आहे.